Gjykata e Posaçme kundër Korrupsionit dhe Krimit të Organizuar ka autorizuar kontrolle të imtësishme në banesën dhe pronat e biznesmenit Artan Dulaku, i cili ndodhet nën hetim për çështjen e portit të Limionit në Sarandë. Lajmi është bërë i ditur nga gazetari i MCN TV, Arsen Rusta.
Sipas burimeve pranë hetimit, gjatë kontrolleve është sekuestruar edhe telefoni celular i zotit Dulaku, ndërsa hetimet po zgjerojnë fokusin edhe te bizneset e Genard Kastratit, administrator i kompleksit “Marina Bay Saranda”.
SPAK ka marrë dritë jeshile nga Gjykata për të vepruar mbi një prej dosjeve më të rëndësishme të momentit, ku përfshihen figura të njohura nga fusha e ekonomisë, biznesit dhe politikës. Në qendër të hetimeve qëndron mënyra e përdorimit dhe tjetërsimit të pronave shtetërore, konkretisht atyre që dikur kanë qenë në administrim të ushtrisë shqiptare.
Sipas aktvendimit të Gjykatës së Posaçme, kontrolli është autorizuar për të verifikuar dyshimet mbi tejkalimin e kontratës së qirasë për portin e Limionit, si dhe për cenimin e masave të sekuestros që ishin vendosur më herët për këtë pronë me vendim gjykate. SPAK dyshon se marrëveshjet për dhënien e kësaj prone janë bërë në mënyrë abuzive, me qëllim përfitime të paligjshme dhe tjetërsim të një aktivi strategjik të shtetit.
Operacioni ka nisur që në orët e para të mëngjesit të sotëm dhe është ende në zhvillim, me forcat e Byrosë Kombëtare të Hetimit (BKH) që ndodhen në terren. Edhe pse nuk ka ende një njoftim zyrtar nga autoritetet, burime pranë hetimit konfirmojnë se janë vendosur masa sekuestroje mbi celularin e Artan Dulakut, si dhe mbi pajisje dhe dokumentacion të kompanive të lidhura me të.
Hetimet pritet të shtrihen më tej, ndërsa dosja po trajtohet si një çështje me rëndësi të veçantë për shkak të përmasave ekonomike dhe implikimeve të mundshme politike.
Discussion about this post