Seanca plenare e sotme në Kuvendin e Shqipërisë është ndërprerë përkohësisht, pas përplasjes mes deputetit Gazment Bardhi dhe kryetarit të Kuvendit, Niko Peleshi.
Shkak për ndërprerjen u bë refuzimi i Bardhit për t’u larguar nga salla, ndonëse ndaj tij kishte një vendim për përjashtim. Në hapje të seancës, Peleshi kërkoi që deputeti të zbatonte rregulloren parlamentare.
“Zoti Bardhi, ju kërkoj të dilni nga salla. Seanca nuk ka filluar, duhet që zoti Bardhi të dalë pasi është përjashtuar…”, deklaroi kryetari i Kuvendit.
Pas refuzimit të Bardhit për të lënë sallën, Peleshi vendosi ndërprerjen e seancës, ndërsa situata mbeti e tensionuar. Nuk dihet ende kur do të rifillojnë punimet.
Ky është një tjetër episod përplasjesh në Kuvend, ku tensionet mes maxhorancës dhe një pjese të opozitës janë shtuar ndjeshëm javët e fundit.
Discussion about this post