Një aksident i pazakontë është regjistruar këtë të enjte në aksin rrugor Vlorë–Orikum, pranë fshatit Radhimë. Një automjet tip “Volkswagen”, i drejtuar nga shtetasi G.D., është përplasur me katër kuaj që ndodheshin në mes të rrugës.
Përplasja ka rezultuar fatale për kafshët, të cilat kanë ngordhur në vendin e ngjarjes. Automjeti ka pësuar dëme të konsiderueshme materiale, por fatmirësisht nuk raportohet për të lënduar mes njerëzve.
Sipas burimeve nga vendngjarja, dyshohet se drejtuesi i mjetit po qarkullonte me shpejtësi mbi normat e lejuara në momentin kur ndodhi aksidenti. Policia rrugore e Vlorës ka marrë në pyetje shoferin dhe ka nisur hetimet për të përcaktuar përgjegjësitë dhe rrethanat e plota të ngjarjes.
Ngjarja ka ngritur shqetësime edhe për mungesën e kontrollit të kafshëve që lëvizin të lira në rrugë, duke rrezikuar jetën e drejtuesve të mjeteve dhe sigurinë rrugore në zonat rurale.
Discussion about this post