Një konflikt për motive të dobëta ka përfunduar në dhunë fizike në lagjen nr. 15 në Durrës, ku një 37-vjeçar ka goditur me sende të forta dy kushërinj, si dhe ka qëlluar në ajër me një armë me fishekë manovër.
Të dëmtuarit janë transportuar në spitalin rajonal, ku kanë marrë ndihmën mjekësore dhe ndodhen jashtë rrezikut për jetën.
Policia ka ndërhyrë menjëherë në vendngjarje dhe ka shoqëruar personat e përfshirë, ndërsa hetimet për zbardhjen e plotë të konfliktit vijojnë.
Njoftimi i policise:
Goditi me sende të forta, për motive të dobëta, 2 shtetas, kapet dhe vihet në pranga, 37-vjeçari.
Sekuestrohet arma me fishekë manovër, me të cilën dyshohet se 37-vjeçari qëlloi në ajër, gjatë konfliktit.
Menjëherë pas njoftimit, rreth orës 08:30, se në lagjen nr. 15, dyshohet gjatë një konflikti për motive të dobëta, shtetasi K. K., 37 vjeç, kishte goditur me sende të forta, shtetasit B. Xh., 66 vjeç dhe A. Xh., 61 vjeç (kushërinj), shërbimet e Komisariatit të Policisë Durrës organizuan punën për kapjen e autorit, si dhe për sqarimin e rrethanave.
Si rezultat i veprimeve të shpejta operacionale, u mundësua arrestimi në flagrancë i shtetasit K. K..
37-vjeçari dyshohet gjithashtu se gjatë konfliktit, ka qëlluar në ajër, me armë me fishekë manovër. Arma u gjet dhe u sekuestrua me cilësinë e provës materiale.
Ndërkohë, 2 të dëmtuarit po marrin asistencë mjekësore dhe janë jashtë rrezikut për jetën.
Materialet procedurale do t’i referohen Prokurorisë së Durrësit, për veprime të mëtejshme.
Discussion about this post