Në Asamblenë e PPE në Vilnius, Lituani, deputetja Albana Vokshi kërkoi një mision urgjent verifikimi në Shqipëri, duke ngritur shqetësime serioze mbi situatën demokratike pas zgjedhjeve të 11 majit 2025.
Vokshi theksoi se parlamenti i ri nuk funksionon, pasi shumica ka refuzuar debatet mbi çështje me rëndësi kombëtare dhe europiane, si programi qeverisës 4-vjeçar, interpelancat urgjente dhe raportet e institucioneve të pavarura, duke mohuar të drejtat kushtetuese të opozitës dhe qytetarëve për t’u informuar.
Vokshi paralajmëroi gjithashtu për rritjen alarmante të pastrimit të parave kriminale, veçanërisht në sektorin e ndërtimit dhe turizmit, duke cituar Raportin e Departamentit Amerikan të Shtetit 2025, sipas të cilit fondet e paligjshme, kryesisht nga trafiku i drogës, dominojnë ekonominë shqiptare, shtrembërojnë konkurrencën dhe pengojnë investimet e ndershme.
Vokshi nënvizoi se kjo nuk është një çështje vetëm për Shqipërinë, por një rrezik rajonal dhe europian, pasi këto fonde mund të ndikojnë në ekonomitë e vendeve të tjera të BE-së.Në përfundim, deputetja Vokshi paralajmëroi se Shqipëria po shkon drejt autokracisë, me rrezikun e ikjes së trurit dhe humbjes së demokracisë, dhe kërkoi nga PPE të ndërmarrë veprime urgjente për të mbrojtur institucionet demokratike dhe funksionimin e shtetit ligjor në vend.
Discussion about this post