Këshilltari për Çështjet Ekonomike në Partinë Demokratike, Dorjan Teliti, ka reaguar pas publikimit të të dhënave më të fundit nga INSTAT, sipas të cilave 40.5% e shqiptarëve janë në rrezik varfërie ose përjashtimi social.
Në një deklaratë publike, Teliti e cilëson këtë situatë si “realitetin e hidhur që çdo ditë e më shumë po boshatis Shqipërinë”, ndërsa akuzon qeverinë për mungesë vizioni dhe keqmenaxhim të burimeve publike.
“Shqipëria ‘kampione’ e varfërisë, çdo gjë tjetër është thjesht propagandë,” – deklaron Teliti, duke theksuar se në zonat veriore, pothuajse gjysma e familjeve nuk arrijnë të përballojnë nevojat bazike për jetesë.
Sipas tij, kjo situatë nuk është pasojë e faktorëve të jashtëm apo rastësorë, por e drejtpërdrejtë e keqqeverisjes, që sipas PD-së ka rritur pabarazinë dhe ka thelluar krizën sociale në vend.
“Ndërsa disa pasurohen padrejtësisht, shumica e qytetarëve jetojnë në ankth për faturat, ushqimin, arsimimin, shëndetin dhe të ardhmen e fëmijëve të tyre,” – vijon reagimi.
Teliti nënvizon se Shqipëria ka potencial për më shumë dhe kërkon “ndryshim rrënjësor”, për të ndërtuar një shtet që punon për qytetarët dhe jo kundër tyre.
Reagimi vjen në një kohë kur të dhënat e INSTAT kanë rikthyer në qendër të debatit publik problematikat ekonomike dhe sociale që prekin shtresat më të brishta të shoqërisë shqiptare.
Discussion about this post