Partia Demokratike ka reaguar përmes një deklarate zyrtare, duke mohuar kategorikisht se ka dhënë ndonjë urdhër verbal apo me shkrim që ndalon përfaqësues apo mbështetës të saj të marrin pjesë në protestën në mbështetje të ish-krerëve të Ushtrisë Çlirimtare të Kosovës, që po përballen me një proces gjyqësor në Hagë.
“Spekulimi banal i ndonjë medieje se ky urdhër ekziston, është pjesë e skenarit të përhershëm anti-opozitar të Ramaduros,” thuhet në reagimin e PD-së, duke e cilësuar këtë një tentativë të radhës për të përçarë opozitën dhe për të manipuluar opinionin publik.
Në deklaratë, PD nënvizon se qëndrimi i saj ndaj luftës çlirimtare të UÇK-së është i qartë, i pandryshueshëm dhe i pandikuar nga axhenda ditore politike.
“Kauza e UÇK-së, lufta e saj dhe e popullit shqiptar të Kosovës, janë jo vetëm të drejta, por edhe pjesë e nderit të përjetshëm të kombit dhe çështjes kombëtare shqiptare,” thuhet më tej në deklaratë, duke theksuar qëndrimin e palëkundur të kryetarit Sali Berisha dhe të forcës politike që ai drejton.
Partia Demokratike i bën thirrje mbështetësve të saj dhe opinionit publik të mos bien pre e dezinformatave mediatike, që synojnë të njollosin qëndrimet e saj në raport me një ndër momentet më të lavdishme të historisë shqiptare moderne.
Discussion about this post