Greva e urisë e punonjësve të kompanisë “Bankers Petroleum” në Marinzë ka hyrë sot në ditën e saj të gjashtë, ndërkohë që situata shëndetësore e disa prej grevistëve po përkeqësohet.
Gjatë qëndrimit në ambientet e jashtme të sindikatës së sektorit hidrokarbur, një prej punonjësve në grevë, Josif Lino, me detyrë mekanik, ka humbur ndjenjat dhe është transportuar menjëherë në qendrën shëndetësore të kompanisë, ku ka marrë ndihmën e parë mjekësore.
Sipas burimeve nga vendngjarja, të paktën 10 anëtarë të këshillit sindikal kanë shfaqur shenja të dukshme të përkeqësimit të gjendjes fizike, si pasojë e mungesës së ushqimit dhe kushteve të vështira gjatë protestës.
Punonjësit e “Bankers Petroleum” kanë hyrë në grevë urie pas dështimit të negociatave për një marrëveshje të re me kompaninë. Ata kërkojnë rritje page, përmirësim të kushteve të punës, transparencë në kontratat e ardhshme dhe garanci për të drejtat e tyre profesionale.
Sindikata ka deklaruar se greva do të vazhdojë deri në një zgjidhje konkrete dhe të pranueshme, duke theksuar se janë të vendosur për të çuar përpara kërkesat e tyre deri në fund.
Discussion about this post