Kjo vjeshtë ka rezultuar veçanërisht e vështirë për fermerët në zonën e Kurjanit, Roskovec, ku prodhimi i ullirit ka shënuar një rënie të ndjeshme. Sipas vetë kultivuesve, rendimenti këtë vit është ulur me më shumë se 50% krahasuar me vitin e kaluar, çka përkthehet në më pak vaj ulliri dhe më pak të ardhura për familjet bujqësore.
Astrit Abedinaj, një ndër fermerët më të mëdhenj të zonës me mbi 700 rrënjë ullinj, shprehet se kjo situatë është tepër shqetësuese, veçanërisht për ata që mbijetojnë falë punës familjare në tokë.
“Këtë vit, të ardhurat janë në minimum. Për fermerët e vegjël, është thuajse zero. Kërkojmë që institucionet përgjegjëse të bujqësisë të mos qëndrojnë pasivë, por të japin orientim dhe ndihmë konkrete,” – u shpreh Abedinaj.
Kodrat e Kurjanit, të mbuluara në mbi 90% me ullinj, përbëjnë zonën kryesore të kultivimit të kësaj kulture në Fier. Megjithatë, mungesa e investimeve, ndryshimet klimatike dhe mungesa e shërbimit agronomik po e kthejnë këtë zonë nga një potencial ekonomik në një problem social.
Fermerët kërkojnë ndërhyrje urgjente nga autoritetet, për të shmangur përkeqësimin e mëtejshëm të situatës dhe për të garantuar mbështetje për sezonin e ardhshëm.
Discussion about this post