Aktorja e humorit Delinda Disha ka shpallur sot kandidaturën të cilën e cilëson të pavarur për Bashkinë Tepelenë pas dorëheqjes së Tërmet Peçit për të marrë mandatin.
Disha thotë se kandidon e pavarur por ishte pjesë e takimit përmbyllës elektoral të kryeministrit Edi Rama në Fier për zgjedhet e 11 Majit.
Disha, me filxhanin simbolik të fatit në dorë, u shpreh me nota lozonjare se fitorja e Partisë Socialiste është e sigurt dhe se në këtë garë ajo do të arrijë plot 78 mandate.
“Ta pashë filxhanin motra jote herën e parë, t’i gjeta të gjitha me porte, me aeroporte, me hekurudha, vetëm Shell-i na u vonua. A fillojmë më Fierin njëherë se e kam pikë të dobët. Filxhani thotë se Fierit, Antalya t’i marri të keqen, se ka për tu bërë nga Semani në Vjosë me resorte, me hotele dhe do të plasi një treg pune. Do të hapen kateringje, një industri e madhe zhvillimi. Më del edhe një “KP” mua këtu. Është Komuna e Parisit se atje e ndërtuan fierakët dhe do të kthehen të gjithë në Fier të punojnë dhe të investojnë se do të zhvillohet turizmi,” i tha ajo kryeministrit buzagaz.
Aktorja vijoi më tej duke “lexuar” edhe më thellë në filxhanin e saj imagjinar, ku pa rrugë, aeroporte dhe zhvillim të turizmit bregdetar.
“S’më gënjen filxhani mua zemra jo. Ja ku është edhe rruga e aeroportit. Ma ndan filxhanin në mes rruga e aeroportit mua, por kemi edhe një rrugë tjetër mo zemra. Është një rrugë blu. Kam përshtypje që kjo do jetë rruga që do të mbulojë komplet me Adriatik, me Jon. Tani ta lej cik këtë unë dhe të jap motra atë porosinë ty, nuskën e fitores. Ta dhashë herën e parë dhe tani me këtë do të fitosh,” u shpreh ajo, duke e shoqëruar fjalimin me gjeste tipike të një “leximi filxhani”.
Në fund, Disha “mbylli profecinë” e saj elektorale me një parashikim përfundimtar që ngjalli duartrokitje në sallë:
“Tani ta shtypim për mandatet se e di aty më qan mua zemra. O 77 ose 78 më dalin mua. Po 78 unë them i ke të marra e vdekur. E fundit filxhani më thotë që mandati i fundit të shoh atje në Bruksel, të ngresh flamurin më të bukur në botë.”
Me këtë performancë të mbushur me humor, metafora dhe sarkazëm, Delinda Disha e ktheu takimin elektoral të PS në Fier në një skenë të vërtetë show politik, ku arti dhe fushata u shkrinë në një “lexim filxhani” që mori më shumë duartrokitje se çdo premtim formal.
Discussion about this post