Argjentina i ka besuar sërish Javier Mileit duke i dhënë atij një fitore të papritur në të gjitha zgjedhjet legjislative që dje rinovuan gjysmën e Dhomës së Deputetëve (127 nga 257) dhe një të tretën e Senatit, shkruan corriere.it.
Partia e presidentit, ‘’La Libertad Avanza’’, ka tejkaluar 40 për qind të votave në nivel kombëtar, duke fituar sfidën me peronistët e ‘’Fuerza Patria’’ në pothuajse të gjitha provincat – nga Kordoba në Santa Fe, deri në skajin jugor të Terra del Fuoco – dhe po rikthehet edhe në provincën e Buenos Aires, një bastion i së majtës, ku në fillim të shtatorit kishte një epërsi prej 14 pikësh në zgjedhjet lokale.
“Urime presidentit Javier Milei për fitoren e tij dërrmuese në Argjentinë. Ai po bën një punë të jashtëzakonshme! Besimi ynë tek ai është justifikuar nga populli argjentinas”, shkroi Trump në Truth.
Asnjëherë një zgjedhje e mesit të mandatit në Argjentinë nuk është ndjekur kaq nga afër nga Uashingtoni dhe e gjithë bota.
Referendumi u shndërrua në një plebishit mbi qeverinë ultraliberale të Mileit, dy vjet pas betimit të tij triumfues si president, nën syrin vigjilent të “mikut amerikan” Donald Trump, i cili ditët e fundit e lidhi mbështetjen vendimtare financiare të Shteteve të Bashkuara me suksesin e presidentit.
”Nëse ai nuk fiton, ne jemi jashtë”, tha Trump.
Sipas parashikimeve fillestare, ‘’Libertad Avanza’’, me 64 përfaqësuesit e saj të sapozgjedhur, do të fitojë më shumë se një të tretën e vendeve në Kongres dhe kështu do të jetë në gjendje të parandalojë opozitën nga bllokimi i vetos presidenciale mbi ligjet që kërcënojnë buxhetin e balancuar.
“Mos u dorëzoni, sepse jemi në gjysmë të rrugës dhe jemi në rrugën e duhur”, tha Milei gjatë evenimentit përmbyllës të fushatës së tij në qytetin e Rosarios.
Discussion about this post