Grupi Parlamentar i Partisë Demokratike ka dorëzuar sot në Kuvend një kërkesë për mocion me debat lidhur me gjetjet e raportit final të OSBE-ODIHR për zgjedhjet parlamentare të 11 majit 2025.
Në kërkesën e firmosur nga kryetari i grupit parlamentar, Gazment Bardhi, theksohet se qëllimi i mocionit është hapja e një debati parlamentar mbi “problematikat, mangësitë dhe shkeljet që shoqëruan procesin zgjedhor”, si dhe kontributi në punën e Komisionit Parlamentar për Reformën Zgjedhore, i ngritur së fundmi me konsensus ndërpartiak.
“Pasur parasysh gjetjet dhe konkluzionet e raportit final të OSBE-ODIHR për zgjedhjet parlamentare të 11 majit 2025, veçanërisht ato që lidhen me shkeljen e parimit të barazisë së palëve në garë, vlerësojmë se është detyra jonë si deputetë të Kuvendit të Shqipërisë që të nxisim një debat të plotë dhe institucional për standardet zgjedhore”, thuhet në kërkesën e Bardhit.
Sipas opozitës, raporti i OSBE-ODIHR evidenton se zgjedhjet e 11 majit u zhvilluan në një klimë të thellë polarizimi politik, ku “garuesit nuk gëzuan mundësi të barabarta”.
Në dokumentin e dorëzuar në Kuvend, PD thekson se partia në pushtet përfitoi nga përdorimi i burimeve shtetërore dhe i kapaciteteve institucionale, duke përfshirë faljen e gjobave vetëm pak orë para ditës së zgjedhjeve, ndërkohë që zyrtarë të lartë qeveritarë u përfshinë në aktivitete zyrtare që “përkonin me mesazhe elektorale”.
Sipas raportit të përmendur nga demokratët, kjo situatë ka bërë të paqartë ndarjen mes shtetit dhe partisë në pushtet.
Në të theksohen gjithashtu pretendime për presion ndaj nëpunësve të administratës publike, intimidim të mbështetësve të opozitës, përdorim të rrjeteve të patronazhimit, si dhe rastet e shitblerjes së votës dhe ndikimin e elementëve kriminalë në disa parti politike.
Opozita kërkon që këto gjetje të diskutohen në mënyrë të plotë në seancë plenare, duke i konsideruar si thelbësore për garantimin e zgjedhjeve të lira dhe të ndershme në të ardhmen.
Discussion about this post