Zhvillimet në selinë blu vijojnë të jenë në kulmin e tyre. Gijotina.com mëson se ish-kryeministri Sali Berisha dhe kreu demokrat Lulzim Basha do të zbresin sot në terren për të kërkuar mbështetje nga demokratët.
Sipas burimeve, Basha do të nisë turin e takimeve nga Fieri, ndërsa ish-kryeministri Berisha sikurse ka lajmëruar më herë, do të jetë në Shkodër.
“Revolucioni nuk do ndalet deri sa të marrim në dorë selinë.” Lideri historik i PD ka ftuar demokratët e Shkodrës që të dielën të mblidhen në orën 11:00 në “Pallatin e Sporteve”, ka lajmëruar Berisha.
Situata në selinë blu ka qenë mjaft e tensionuar sidomos pas protestës së thirrur nga Berisha ku mbështetësit e tij shkatërruan godinën e PD. Pak ditë më vonë, Kryesia mori vendimin ekstrem për përjashtimin e 7 demokratëve, ndërsa pezulloi disa të tjerë.
Ndërsa ditën e djeshme u mblodh Këshilli Kombëtar ku u morën vendime të rëndësishme. Basha njoftoi se Alfred Rushaj nuk do të mbajë më postin e kreut të grupit parlamentar të PD, por do të zëvendësohet nga Enkelejd Alibeaj, ndërsa zëvendësoi edhe mbështetësit e Berishës nga komisionet parlamentare.
Discussion about this post