Pas kombëtares së Shqipërisë, edhe përfaqësuesja e Kosovës në futboll ka marrë zyrtarisht një vend në play-off-in e Kupës së Botës 2026. ‘Dardanët’ e trajnerit Franco Foda fituan 0-2 kundër Sllovenisë në Ljubljanë dhe kështu e mbyllin Grupin B në vendin e dytë, paçka se tre ditë më vonë luajnë në Prishtinë kundër Zvicrës, për ndeshjen e fundit kualifikuese. Helvetët fituan 4-1 kundër Suedisë edhe me gol të Granit Xhakës dhe kështu janë në krye të këtij grupi me 13 pikë, tre më shumë se Kosova. Zvicra është e avantazhuar në përballjen direkte kundër Kosovës, duke qenë me një golavarazh +12.
Në Ljubljanë, Kosova shënoi pas vetëm gjashtë minutave lojë me autor Fisnik Asllanin. Sulmuesi mori një pasim nga Vojvoda dhe me të djathtën ia ndali në rrjetë sferën gardianit Oblak. ‘Dardanët’ patën shumë raste në pjesën e parë, por pa mundur të shënonin. Në pjesën e dytë, Stojanovic i futur në lojë vetëm në minutën e 46-të doli pas dy kartonave të verdhë nga fusha në minutën e 53-të, duke i dhënë Kosovës një avantazh numerik në fushë.
Duhej minuta e 64-t që Kosova të ‘vuloste’ fitoren me autogolin e Karnicnic. Florent Muslija ishte ngulmues, duke detyruar futbollistin vendas të shënonte në portën e tij.
Kështu, me rezultatin 0-2 Kosova siguron për herë të parë play-off e Kupës së Botës 2026 dhe më 20 nëntor, ashtu si Shqipëria do mësojnë rivalët. Të shpresojmë që dy skuadrat të ndodhen në një vazo dhe mos përballen mes tyre, pasi kuqezinjtë e Sylvinhos kanë shanse për t’u ngjitur në vazon dy dhe skuadrat e kësaj vazoje do ndeshjen me ato të vazos tre.
Discussion about this post