21 Janari/Berisha: Unë e kam quajtur vrasje shtetërore përpara Strasburgut

Lideri i opozitës, Sali Berisha, deklaroi se ai është i pari që e ka cilësuar ngjarjen e 21 janarit si “vrasje shtetërore”, duke e bërë këtë edhe përpara gjykatës së Strasburgut.

Berisha shpjegoi se kjo konkludim bazohet në ekspertizat mjeko-ligjore, të cilat treguan se plagët nuk ishin shkaktuar nga afër, dhe sipas tij, kjo dëshmon për përgjegjësi të strukturave shtetërore në ngjarje.

Pjesë nga deklarata:

Meqë e ndjek këtë punë, a mos e ka konsideruar edhe Sali Berisha vrasje shtetërore?

Jo, jo, a mos e ka thënë Sali Berisha i pari para Strasburgut këtë?

Për të qenë konsekuente me veten tënde, jam unë i pari që e kam quajtur pasi njëherë u tha se ishte nga afër, u bë ekspertiza, u tha nuk janë nga afër, se kishte një ekspertizë kirurgësh dhe kirurgu e ka mbrojtur edhe dy vite më parë atë ekspertizë.

Por, ekspertiza tjetër tregoi se nuk ishin plagë nga afër dhe unë bazuar në atë e kam quajtur vrasje shtetërore.

Berisha deklaroi se nuk është thirrur në SPAK, asnjëherë për ’21 Janarin’, pasi sipas tij kanë pasur frikë nga dëshmitë që do jepte. Gjithashtu, Berisha rikujtoi se demonstrata e 21 janarit ishte një nga më të dhunshmet në historinë e vendit, me gurë dhe plumba duke goditur ndërtesat, xhama të thyer dhe automjete të sulmuara, dhe se sipas vlerësimeve ndërkombëtare, Partia Socialiste kishte një axhendë dhune.

“Siç dëgjove, kjo çështje është hetuar dhe janë dhënë një seri dënimesh. Për këtë çështje, Sali Berisha ka bërë deklaratë në darkën e asaj nate. Nuk është thirrur asnjëherë, as edhe një herë të vetme, përkundrazi kanë biseduar me mua të huaj, zyrtarë të lartë të ndryshëm, dhe nuk më ka thirrur prokuroria e shtetit, nuk më kanë thirrur asnjëherë sepse kanë pasur frikë nga dëshmitë e mia. Sepse ajo ishte demonstrata më e dhunshme në historinë e vendit dhe se ka deklarata të vendeve më të fuqishme të planetit se PS kishte axhendë dhune.
Pra, axhenda e dhunës.

Dhe cilido që e hap në sekuencat më minimale, sheh aty mijëra gurë duke vërshuar drejt mbrojtësve të ndërtesës, sheh plumba në dritaret e ndërtesës, vrima plumbash, sheh xhama të thyer me gurë, sheh automjete që duan të thyejnë derën. Pra, kjo ishte protesta më e dhunshme që ka njohur vendi. Dhe ka një përcaktim ndërkombëtar se PS kishte një axhendë dhune. Pra, në rast se do isha thirrur, absolutisht do kisha shkuar sa herë të isha thirrur”, u shpreh ai.