Mijëra faqe interneti në mbarë botën, përfshirë edhe në Shqipëri, u ndërprenë për disa orë pas një problemi teknik në rrjetin e Cloudflare. Situata tashmë është stabilizuar dhe shumica e shërbimeve janë rikthyer në funksion.
Cloudflare, një prej platformave kryesore të infrastrukturës së internetit, u përball me një defekt që çoi në paralizimin e mijëra faqeve. Përdoruesit hasën mesazhin “internal server error on Cloudflare’s network”, duke mbetur pa qasje për një periudhë të konsiderueshme.
Në një njoftim zyrtar, kompania bëri të ditur se ishte në dijeni të incidentit dhe po punonte për zgjidhjen e tij. Pas disa orësh ndërhyrje teknike, shërbimi u rikthye pjesërisht fillimisht, ndërsa më pas normalizimi u përhap në të gjithë rrjetin.
Edhe platforma e monitorimit të ndërprerjeve, DownDetector, pati probleme për t’u ngarkuar gjatë pikut të raportimeve, duke treguar përmasën e avarisë.
Discussion about this post