Një ngjarje e rëndë ka tronditur sot qytetin e Lushnjës, ku një person ka mbetur i plagosur me armë zjarri. Policia ka konfirmuar zyrtarisht se rreth orës 10:40, në afërsi të stadiumit të Lushnjës, është plagosur në këmbë Julian Sulo (J.S.), 45 vjeç, i njohur edhe si “Juli i Pashakos”.
Sipas burimeve pranë bluzave të bardha, Sulo ndodhet jashtë rrezikut për jetën.
Shërbimet e Policisë kanë rrethuar menjëherë zonën dhe kanë ngritur pika kontrolli në të gjitha hyrje-daljet e qytetit. Në vendngjarje, ku dyshohet se u qëllua drejt automjetit të Sulos nga të paktën tre persona, janë gjetur dhjetëra gëzhoja.
Në vijim të operacionit, në afërsi të fshatit Lifaj u sekuestrua një automjet duke u djegur plotësisht, i cili dyshohet se u përket autorëve të atentatit, të cilët tentuan të zhduknin provat gjatë largimit.
Grupi hetimor, nën drejtimin e Prokurorisë, ka nisur punën intensive për zbardhjen e plotë të rrethanave, identifikimin e autorëve dhe motivit që qëndron pas këtij sulmi me armë zjarri.
E kaluara
“Juli i Pashakos” është një emër jo i panjohur për policinë. Ai njihet dhe si rival i Aldo Bares, pasi është një nga personat e shoqëruar si të dyshuar për masakrën e Lushnjës të ndodhur në 2018-tën, ku mbetën të vrarë dy persona, miq të nipit të Bares, por u la i lirë për mungesë provash.
Ndërsa më 11 qershor 2016, Julian Sulos iu bë atentat pas ndeshjes Shqipëri-Zvicër në një pikë bastesh nga Arjan Aliço, anëtar i bandës së Aldo Bares, i njohur si “Arti i Braçes”.
Në vitin 2018, ai u arrestua nga Policia e Lushnjës dhe FNSH-të e Fierit pasi sipas raportimeve mediatike të kohës, nuk i është bindur policisë ndërsa lëvizte me makinë të blinduar dhe i është gjetur një armë me 15 fishekë.
Tre vite më parë, Prokuroria e Lushnjës konfirmoi se me kërkesë së saj, Gjykata konfiskoi disa pasuri të Sulos,për shkak se sipas akuzës, janë përfituar me burime të paligjshme.
Discussion about this post