Policia e Kosovës ka njoftuar opinionin publik lidhur me qarkullimin e disa e-maileve të rremë, të cilat po dërgohen në adresa të ndryshme elektronike dhe paraqiten sikur janë dokumente zyrtare të Policisë së Kosovës ose të institucioneve të tjera vendase dhe ndërkombëtare.
Sipas njoftimit, këto e-maile mbajnë titullin “Thirrje Gjyqësore”, përmbajnë numra referues dosjesh dhe pretendojnë në mënyrë të rreme se janë lëshuar nga zyrtarë të lartë të Policisë së Kosovës, Agjencia e Sigurisë Kibernetike, FBI, Policia Kundër Krimit Kibernetik dhe Interpoli.
Policia sqaron se këto dokumente nuk janë zyrtare dhe nuk janë lëshuar nga asnjë institucion shtetëror apo ndërkombëtar, por bëhet fjalë për materiale të falsifikuara me qëllim mashtrimi.
PK bën të ditur se, në bashkëpunim me organet e drejtësisë, ka nisur hetime të thelluara duke angazhuar njësitë përkatëse policore, me synim identifikimin dhe arrestimin e personave përgjegjës për këtë aktivitet të paligjshëm.
Policia e Kosovës u bën apel qytetarëve të mos bien pre e mashtrimeve dhe dezinformimeve të tilla. Çdo person që merr e-mail apo dokumente të dyshimta, këshillohet t’i raportojë në adresën zyrtare: [email protected], për trajtim të mëtejshëm.
Discussion about this post