Kreu i Partisë Demokratike, Sali Berisha, ka shpallur thirrjen për një protestë kombëtare më 22 dhjetor, duke paralajmëruar se opozita do të intensifikojë aksionin politik dhe protestat deri në krijimin e një qeverie teknike që, sipas tij, do të garantojë zgjedhje të lira dhe të ndershme.
Gjatë një deklarate para strukturave të PD-së, Berisha u shpreh se opozita ndodhet përballë një problemi themelor të ekzistencës së saj politike, në një vend që ai e cilësoi si diktaturë autoritare, ku pushteti përdor të gjitha mekanizmat shtetërorë për të manipuluar procesin zgjedhor.
“Në farsën elektorale më të shëmtuar në histori, shqiptarët votuan mbi 500 mijë për opozitën dhe PD-në si forcë të parë. Sot PD-ja është përballë një alternative: të mbetet opozitë e farsave elektorale apo të vendosë si qëllim rrëzimin e këtij regjimi dhe rikthimin e votës së lirë,” deklaroi Berisha.
Ai akuzoi qeverinë se ka përdorur miliarda euro përmes gjobave, kamatave dhe skemave financiare që, sipas tij, prekin qindra mijëra familje dhe dhjetëra mijëra biznese, ndërsa paralelisht ka arrestuar drejtues të opozitës në vit elektoral.
Berisha sulmoi ashpër edhe funksionimin e institucioneve, duke deklaruar se parlamenti kontrollohet plotësisht nga qeveria, ndërsa mediat, sipas tij, janë shndërruar në “altoparlantë të pushtetit”, duke mbuluar skandalet dhe duke sulmuar opozitën.
Në fjalën e tij, ai denoncoi gjithashtu atë që e cilësoi si lobim ndërkombëtar të paguar nga qeveria, për të mbrojtur imazhin e kryeministrit Edi Rama dhe për të relativizuar problematikat e zgjedhjeve dhe korrupsionit.
“Deklaratat për zgjedhje të lira nuk janë spontane. Janë të paguara. Janë produkt i lobingjeve që zëvendësojnë standardet dhe kriteret demokratike,” u shpreh Berisha.
Sipas tij, opozita nuk ka më kohë për filozofi politike, por duhet të përqendrojë të gjitha energjitë në largimin e qeverisë nga pushteti, pasi, siç tha ai, “me votë kjo qeveri nuk largohet”.
“Duhet t’i besojmë protestës. Duhet t’i organizojmë dhe t’i nisim sa më parë. Protestat para Kryeministrisë kanë nisur, por më 22 dhjetor thërrasim protestë kombëtare,” deklaroi Berisha.
Ai theksoi se Partia Demokratike do të jetë nxitëse e protestave deri në ditën e fundit, derisa të realizohet qëllimi kryesor i opozitës: krijimi i një qeverie teknike për zgjedhje të lira.
“Agjendë tjetër nuk ka dhe nuk mund të ketë PD,” përfundoi Berisha.
Discussion about this post