Policia e Vlorës ka zbardhur ngjarjen e ndodhur rreth tre javë më parë në qytetin e Vlorës, ku një sasi lënde plasëse shpërtheu në portën e jashtme të një banese.
Në kuadër të operacionit policor të koduar “Objektivi”, të zhvilluar nga Komisariati i Policisë Vlorë dhe strukturat hetimore të DVP Vlorë, nën drejtimin e Prokurorisë së Vlorës, janë identifikuar, lokalizuar dhe arrestuar autorët e dyshuar të ngjarjes, babë e bir.
Ngjarja ka ndodhur më 29 nëntor 2025, kur një sasi lënde plasëse shpërtheu në portën e jashtme të banesës së shtetases B. Z. Pas hetimeve intensive, policia bëri të mundur ndalimin e dy shtetasve:
D. G., 59 vjeç, banues në Babicë e Madhe, Vlorë
F. B., 29 vjeç, banues në Babicë e Madhe, Vlorë
Ata akuzohen për veprat penale “Shkatërrimi i pronës me eksploziv”, kryer në bashkëpunim, si dhe “Vjedhja”.
Sipas hetimeve paraprake, dyshohet se dy të arrestuarit kanë mbajtur në banesën e tyre një automjet tip “Volkswagen Golf Plus”, i cili rezulton i vjedhur në qytetin e Elbasanit. Më pas, më 29 nëntor 2025, automjeti dyshohet se është përdorur për t’u afruar pranë banesës së shtetases B. Z., ku është vendosur lënda plasëse që më pas ka shpërthyer.
Pas kryerjes së ngjarjes, automjeti i përdorur nga autorët dyshohet se është djegur dhe është gjetur në fshatin Babicë e Vogël, Vlorë.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, ndërsa hetimet vijojnë për dokumentimin e plotë të ngjarjes dhe për identifikimin e personave të tjerë të mundshëm të përfshirë.
Discussion about this post