Moska ka gjasa të ketë stacionuar raketa balistike hipersonike me kapacitet bërthamor në një ish-bazë ajrore në Bjellorusinë lindore, një zhvillim që mund të forcojë ndjeshëm aftësinë e Rusisë për të goditur objektiva në të gjithë Europën, raporton “Reuters”.
Këtë vlerësim e kanë bërë dy studiues amerikanë, pas analizimit të imazheve satelitore.
Sipas një burimi të njohur me çështjen, i cili foli në kushte anonimiteti, përfundimet e studiuesve përputhen gjerësisht me vlerësimet e inteligjencës amerikane, megjithëse informacioni nuk është autorizuar për publikim zyrtar.
Presidenti rus Vladimir Putin e ka bërë të qartë synimin e tij për të vendosur në Bjellorusi raketa Oreshnik me rreze të mesme veprimi, të cilat vlerësohet se kanë një rreze deri në 5.500 kilometra. Megjithatë, vendndodhja konkrete e këtyre raketave nuk ishte raportuar më parë.
Ekspertë të sigurisë vlerësojnë se dislokimi i raketave Oreshnik do të theksonte mbështetjen gjithnjë e më të madhe të Kremlinit te kërcënimi bërthamor, si mjet për të dekurajuar vendet e NATO-s nga furnizimi i Ukrainës me armë që mund të godasin thellë brenda territorit rus.
Zhvillimi pritet të rrisë shqetësimet për sigurinë në Europë dhe të tensionojë më tej marrëdhëniet mes Rusisë dhe aleatëve perëndimorë.
Discussion about this post