Ndërtime pa leje në zemër të Butrintit, Prokuroria çon në gjyq zyrtarët e IVMT Sarandë

Prokuroria pranë Gjykatës së Shkallës së Parë të Juridiksionit të Përgjithshëm Sarandë ka përfunduar hetimet dhe ka dërguar për gjykim pesë shtetas, mes të cilëve kryeinspektorin dhe disa inspektorë të Inspektoratit Vendor të Mbrojtjes së Territorit (IVMT), Bashkia Sarandë, për veprat penale “Shpërdorim detyre” dhe “Ndërtim i paligjshëm”.

Sipas organit të akuzës, procedimi penal nr. 416 i vitit 2023 ka zbuluar se në zonën e Ksamilit, në vendin e quajtur “Kanali i Vivarit”, janë kryer ndërtime në një sipërfaqe të konsiderueshme pa leje ndërtimi nga Agjencia e Zhvillimit të Territorit dhe pa kontratë me Agjencinë Kombëtare të Bregdetit.

Kanali i Vivarit është pjesë e Parkut Kombëtar “Butrint” dhe gëzon statusin Monument Natyre (MN), sipas Vendimit të Këshillit të Ministrave nr. 303, datë 10.05.2019, të ndryshuar me VKM nr. 187, datë 25.03.2021. Për këtë arsye, çdo ndërhyrje ndërtimore në këtë zonë i nënshtrohet një regjimi të rreptë ligjor.

Nga hetimet rezultoi se punonjësit e IVMT të Bashkisë Sarandë nuk kanë ndjekur procedurat ligjore për konstatimin e plotë të punimeve dhe nuk kanë marrë masat administrative të parashikuara nga ligji, përfshirë vendosjen e gjobave, duke lejuar vijimin e ndërtimeve të paligjshme në zonë të mbrojtur.

Në përfundim të hetimeve, Prokuroria ka dërguar në gjyq:

• R.P., i akuzuar për veprat penale “Ndërtimi i paligjshëm”, “Pushtimi i tokës”, “Shpërdorimi i tokës” dhe “Dëmtimi i habitateve në zonat e mbrojtura mjedisore”;

• Personin juridik “Laguna Invest”, i akuzuar për “Ndërtim të paligjshëm” dhe “Pushtim toke”;

• Shtetasit E.Z., B.K. dhe V.X., me detyrë inspektorë të IVMT, Bashkia Sarandë, të akuzuar për veprën penale “Shpërdorim detyre”;

• Shtetasin A.M., kryeinspektor i IVMT, Bashkia Sarandë, në kohën e kryerjes së veprës penale, i akuzuar po ashtu për “Shpërdorim detyre”.

Çështja tashmë pritet të shqyrtohet nga gjykata, ndërsa hetimi hedh dritë mbi përgjegjësinë institucionale dhe individuale për dëmtimin e një prej zonave më të rëndësishme të mbrojtura natyrore dhe kulturore në vend.