I mbiquajturi “Beu” i Këlcyrës, kryetari i bashkisë, Klement Ndoni, e ndan buxhetin e investimeve me miqtë e tij. Një nga këta është biznesmeni Arben Hodo me bazë në Përmet dhe Gjirokastër. Edhe këtë radhë, kompania e tij “Hito ‘94” është favorizuar nga Ndoni.
Tenderi ka si objekt “Këlcyra Historike dhe Natyrore”, me burim financimi nga Buxheti i Shtetit.
Janë 12 647 771,00 lekë pa TVSH, të ndara për këtë projekt dhe po xhirohen në arkën e firmës së Hodos dhe të operatorit tjetër që është në marrëveshje BOE, “AD-STAR” shpk me pronar Alfred Çoma.
Megjithëse data e mbajtjes se tenderit ishte me 26 nëntor 2025, fituesi është bërë i ditur nga Agjencia e Prokurimit Publik më 31 dhjetor 2025. Në këtë tender ka marrë pjesë vetëm një operator konkurrues: Arben Hodo.
Procedura është shënuar nga Open Data Albania me “Flamur të kuq” që është shenja e riskut të korrupsionit.
Kompania e Hodos nuk plotëson kriteret e tenderit
Nëse kryebashkiaku do të kujdesej për paratë e taksapaguesve siç e kërkon ligji, duhej që tenderi të anulohej. Përveç faktit se ky është një tender pa konkurrencë, janë disa kritere të shpallura nga vetë autoriteti kontraktues, që kompania e Hodos nuk i përmbush. Për shembull, në këtë moment kjo firmë është e angazhuar me mjete dhe personel në një kontratë tjetër publike. Bëhet fjalë për prokurimin me objekt “Sistemim, Asfaltim rruga Liqeni Këlcyrë dhe Varreza Publike”. Paratë janë të taksapaguesve të Bashkisë Këlcyrë dhe paguhen për projektin me kohëzgjatje 6 muaj. Komisioni e ngritur nga kryetari e kishte caktuar fondin limit 58 328 305,00 lekë pa TVSH. Ndërsa tenderi është mbajtur shpejt e shpejt më 21 korrik 2025.
Megjithëse kanë marrë pjesë 5 operatorë ekonomikë, tenderi nuk ka pasur ndonjë garë të mirëfilltë. Dyshimet për kurdisjen e tenderit qëndrojnë në faktin se në renditjen e ofertave, e para nuk është kompania fituese “Hito 94” shpk, por firma “ED KONSTRUKSION” shpk. Kjo e fundit kishte propozuar ofertën 41,441,400.00 lekë pa TVSH. Ndërsa kompania e Arben Hodos ka dhënë vlerën 42 551 103,00 lekë pa TVSH. Kompania e parë është tërhequr në fund nga gara duke mos paraqitur dokumentet provuese.
Më 17 shtator 2025 kryetar Ndoni ka shpallur fituesi mikun e tij. Edhe ky tender është shënuar me “Flamur të kuq” korrupsioni.
Nga ana tjetër, miku i kryetarit nuk ka kapacitet financiar, pra nuk e përmbush këtë kriter. Sipas dokumenteve të tenderit, në tre vitet e fundit, kompania duhet të ketë bilanc pozitiv. Por shikojeni më poshtë grafikun e fitimeve të kompanisë.
Dy vitet e fundit, kompania “Hito 94” rezulton me humbje respektivisht 71 milionë lekë dhe 130 milionë lekë. Megjithëse fiton tendera pa fund, Arben Hodo raporton humbje tek Tatimet. Ku i ka dërguar paratë? Ndoshta ka ndihmuar fushatën elektorale të kryebashkiakut.
Janë të shumtë tenderat që ka marrë kompania e Hodos nga bashkia Këlcyrë, megjithëse prezantohet me ofertat më të shtrenjta. Rasti më skandaloz evidentohet në 25 qershor 2019. Me firmën e kryetarit Ndoni, Arben Hodo mori tenderin me objekt “Skema Ujitëse Ballaban, Ujitja e Fushës Ballaban vazhdimi” me fond limit 23,308,514.00 lekë pa TVSH.
Por kur ke mbështetjen e “Beut” të Këlcyrës nuk ka pse ta ulësh pazarin! Thuhet se kryetar Ndoni ka fituar imunitet edhe nga prokuroria. Në vitin 2019, banorët e prekur nga veprimet arbitrare të kryebashkiakut e kallëzuan për shpërdorim detyre në Prokurorinë e Përmetit.
Në tetor 2023, SPAK e mori nën hetim kryebashkiakun e Këlcyrës, Klement Ndoni, pasi akuzohet nga qytetarë të Këlcyrës se ka ofruar favore dhe para në këmbim të votës. Prokurori Olsi Dado, i cili ka në dorëzim procedimin penal nr.178 të vitit 2023, ka marrë disa persona në pyetje, të cilëve, sipas kallëzimit, u është ofruar mbështetje në formë ryshfeti kundrejt votës për kryebashkiakun në zgjedhjet e 14 majit 2023. Pasi siguroi mandatin e katërt me këto metoda, Ndoni po bën pasuri me tenderat për brezin e katërt!
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post