Kryetari i Partisë Demokratike të Fierit, Agron Kapllanaj ka publikuar një video në profilin e tij në Facebook, me anë të së cilës ka ironizuar ish-kryeministrin Sali Berisha. Kjo video vjen si pasojë e protestës së disa mbështetësve të Berishës, kur Lulzim Basha zhvilloi një takim në Fier, ndërsa ata e prisnin me pankarta dhe mbishkrimin “non grata”.
Kapllanaj shkruan se Berisha e ka të kotë përpjekjen, pasi ai është vetëm një e shkuar e keqe për PD-në dhe emri i tij do mbahet mend si një nongrata për korrupsion.
“Plaku i padëshëruar non-grata, me një grusht të vogël njerëzish, po bëhet gazi i botës duke bërë gjithçka që të vendosë disa njerëz të gënjyer përballë demokratëve që kanë vendosur të shohin nga e ardhmja jo nga e shkuara. Por më kot e ka Sali Berisha që merr në telefon 10 njerëz e i detyron të bëjnë antimitingjet si në kohën e Ramiz Alisë. Por ai është vetëm një e shkuar e keqe për PD-në dhe gjithë shqiptarët, dhe emri i tij do mbahet mend si një nongrata për korrupsion”, shprehet Kapllanaj.
Ish-Kryeministri, Sali Berisha akuzoi disa ditë më parë dy kryetarët e degëve të PD në Fier dhe Durrës. Berisha tha se kryetari i PD në Fier, Agron Kapllanaj ka përfituar 32 milionë euro tendera nga mazhoranca socialiste, ndërsa kreu e PD në Durrës Luan Hoti duke e quajtur “njeriun e rimorkatorëve”.
Discussion about this post