Pas ekzekutimit të Jani Aliajt një tjetër shqiptar plagoset me thikë në burgun grek

Vetëm 10 ditë pas ekzekutimit të shqiptarit Jani Aliaj në burgun famëkeq të Koridhalos në Greqi, një tjetër shqiptar është plagosur me thikë në burgjet greke, 46-vjeçari nga Labova e Gjirokastrës, Dhimitër Meci

Sipas mediave greke bëhet me dije se shqiptari i njohur me pseudonimin “Demos” u plagos pasditen e sotme, menjëherë pas transferimit të tij në burgun e Malandrinos. Fatmirësisht ai ndodhet jashtë rrezilut për jetën.

Dhimitër Meci alias Dhimo Meci, u arrestua nga policia greke së bashku me Andrea Brokerin nga Himara, Fatjon Prendin nga Lezha si dhe disa grekë, në një operacion ku u shpall në kërkim edhe Vasil Theohari nga Finiqi.

Bëhet fjalë për një nga vrasësit famëkeq të botës së krimit në Athinë, i cili konsiderohet si “truri” i atentatit ndaj Jani Lalës në maj të vitit 2025, kur automjeti i këtij të fundit u qëllua me dhjetëra plumba kallashnikovi.

Lala kishte shpëtuar atëherë falë blindimit të rëndë të Mercedesit luksoz që drejtonte (shënim: Jani Lala u vra përfundimisht më 1 nëntor në Arahova, ndërsa policia e Drejtorisë për Luftën kundër Krimit të Organizuar arrestoi 4 persona, shtetas me origjinë nga Rusia dhe grekë).

“Dimos” kishte gjithashtu lidhje shumë të ngushta me Panagiotis Vlastos, figurë drejtuese e të ashtuquajturës Greek Mafia.

Pas arrestimit, ai mbahej në spitalin psikiatrik të burgut të Korydallos, ku iu nënshtrua ekzaminimeve nga specialistë. Sot ishte planifikuar transferimi i tij në burgun e Malandrinos dhe, pa mbërritur ende në pavijonin ku do të mbahej, ai u sulmua me një mjet prerës artizanal nga një i burgosur tjetër.

Si pasojë e sulmit, 45-vjeçari u plagos rëndë, por jeta e tij nuk është në rrezik. Autori, një shtetas grek i akuzuar për pjesëmarrje në organizatë kriminale dhe që punonte në kioskun e burgut, u arrestua menjëherë.

Ekzekutori shqiptar ka qenë dhjetëra herë në fokus të autoriteteve, për ekzekutime me pagesë, tentativa vrasjeje, shantazhe dhe grabitje.

gijotina.com/