Komisioneri Shtetëror i Zgjedhjeve Ilirjan Celibashi ka dalë në një konferencë për të dhënë më shumë detaje lidhur me organizmin e zgjedhjeve lokale të 6 marsit.
Celibashi u shpreh se kostoja e zgjedhjeve të pjesshme lokale të 6 marsit në 6 bashki të vendit është 180 mln lekë, ndërsa shtoi se në të gjitha bashkitë do të aplikohet identifikimi elektronik, përveçse në Vorë, ku do të aplikohet edhe votimi elektronik.
“Kemi bërë një vlerësim paraprak të kostos dhe në fund të ditës së sotme do ta përfundojmë, janë rreth 180 mln lekë kosto. Po punojmë, edhe pse koha është e shkurtër. Do të bëjmë edhe një sqarim, edhe për këto zgjedhje të aplikohet identifikimi elektronik. Në një konsultim me partitë do të vendosim në lidhje me zhvillimin, aplikimin e votimit elektronik në bashkinë e Vorës. E kemi një eksperiencë në Tiranë. Qëllimi është ta aplikojmë votimin elektronik edhe në zgjedhjet e bashkisë Vorë, por do ta diskutojmë me partitë politike” deklaroi ai.
I pyetur nga gazetarët nëse njeh kandidatët e Bashës apo Berishës, Celibashi i qartë, kur tha se përgjigja dihet, duke lënë të kuptohet se njeh Lulzim Bashën si kryetar. Megjithatë shtoi se kur të bëhet regjistrimi i partive do të jetë përgjigja zyrtare.
“Partia që kërkon të regjistrohet duhet të paraqesë një sërë dokumentesh , një prej tyre nga gjykata e Tiranës që përmban të dhënat mbi partinë politike, përfshirë emër, organet drejtuese, organet kompetente për të mbajtur marrëdhëniet me të tretët. Kështu që nuk është një çështje e komisionit është një çështje e përcaktuar mirë nga ligji dhe në momentin që do të fillojë procesi i regjistrimit të partive, ju do të merrni dijeni mbi partitë që regjistrohen dhe përfaqësuesit e tyre”, deklaroi ai.
Discussion about this post