Vritet me thikë 22-vjeçari shqiptar në Londër, nipi i këngëtarës së njohur

Një ngjarje tragjike ka ndodhur në jug të Londër, ku një i ri shqiptar është goditur me thikë dhe ka humbur jetën.

22-vjeçari me origjinë nga Kosova, Lorik Abazi, u gjet i plagosur në Hesterman Way të dielën dhe, pavarësisht përpjekjeve mjekësore, ai ndërroi jetë në spital.

Këngëtarja shqiptare Ganimete Abazi, e njohur si Ganja, ka ndarë një lajm të dhimbshëm me ndjekësit e saj në rrjetet sociale.

Përmes një mesazhi prekës në Instagram, Ganja ka shprehur dhimbjen e saj per nipin: “Ahhh bre sa e vështirë me ta thënë lamtumirë, Loriku ynë. Jeta shpeshherë është e padrejtë dhe godet aty ku dhemb më së shumti. Pusho në paqe, nipi jem, shpirti jem. Ne do të jetojmë me dhimbjen për ty, me kujtimet dhe dashurinë që na dhe”.

Pas ngjarjes, dy vajza, të dyja 25 vjeçare, dhe një djalë 28 vjeçar u arrestuan si të dyshuar për vrasje. Njëra nga vajzat u lirua me kusht, ndërsa hetimet vijojnë.

Kryeinspektori Nick Blackburn ka shprehur ngushëllimet për familjen e të ndjerit, duke deklaruar: “Mendimet e mia janë me familjen dhe të dashurit e Lorikut, të cilët kanë pësuar një humbje të paimagjinueshme.”