Prokuroria e Tiranës ka thirrur drejtuesen e Korporatës Shqiptare të Investimeve, Elira Kokona, për të marrë në pyetje lidhur me një kallëzim të paraqitur ndaj saj.
Sipas raportimeve Kokona do të pyetet në cilësinë e “personit në dijeni”.
Kallëzimi është depozituar nga biznesmeni Thanas Biqiku. Në kuadër të këtij procedimi, do të merren në pyetje edhe disa persona të tjerë, përfshirë Enkelejd Musabelliu, Kastriot Gurra, Enkelejda Muça dhe Ermal Nufi, i cili është zëvendës-shefi i kabinetit të kryeministrit Edi Rama.
Ndërkohë emri i Elira Kokonaës lidhet edhe me parkun fantazmë “Durana”. “Durana Tech Park” u themelua si park teknologjik në Shqipëri nën pronësinë e Korporatës Shqiptare të Investimeve, e drejtuar nga Elira Kokona.
Sipas dokumenteve dhe raportimeve të mediave, parku nuk ka ndërtuar asnjë godinë fizike dhe funksionon vetëm në mënyrë virtuale, megjithëse tenderë dhe lehtësira fiskale janë dhënë për të.
Skandali ka përfshirë regjistrimin e kompanive që përfitojnë përjashtime tatimore dhe lehtësime doganore, përfshirë biznese të konsoliduara dhe jo start-up-e, si dhe individë me dosje në SPAK, të përfshirë në tendera të dyshuar dhe fatura fiktive.
Discussion about this post