Një zyrtar i qeverisë siriane i tha Sky News se kampi al Hol, në verilindje të Sirisë, është tashmë pothuajse i zbrazur. Ai pranoi se arratisjet vazhduan edhe pasi shteti mori kontrollin e kampit. Burime për Report Tv bënë me dije se në kampin e ferrit ishin të paktën 22 shqiptarë (gra, fëmijë), që rrjedhimisht janë larguar tashmë. Kampi al Hol ishte ai nga ku u largua pas 12 vitesh edhe e reja shqiptare Eva Dumani, që disa më parë u bashkua në Shqipëri me nënën dhe të vëllain.
Prej vitesh, al Hol ka strehuar dhjetëra mijëra gra dhe fëmijë të lidhur me luftëtarë të dyshuar të ISIS, si edhe sirianë dhe irakianë të zhvendosur nga lufta. Kampi drejtohej më parë nga autoritetet kurde, por muajin e kaluar kaloi nën kontrollin e qeverisë siriane, ndërsa Damasku zgjeroi praninë e tij në zonë.
Fadi al Qassem, përfaqësues i Ministrisë së Jashtme siriane për administrimin e kampit, tha se shumë familje u larguan edhe kur forcat shtetërore ishin në terren, sepse kampi është i madh dhe rrugët e kontrabandës janë të shumta. Sipas tij, kur ushtria siriane mbërriti, kampi ishte tashmë kryesisht i zbrazur: rojet ishin larguar dhe portat ishin të hapura..
Ai theksoi se qeveria trashëgoi regjistra të pasaktë të banorëve dhe rrjete të konsoliduara kontrabande, çka e bëri të vështirë të përcaktohej se kush ndodhej realisht në kamp në momentin e marrjes së kontrollit. Zyrtarët zbuluan edhe dokumente të falsifikuara, me familje që përdornin karta regjistrimi të personave që ishin larguar më herët në mënyrë të paligjshme.
Autoritetet po përpiqen të identifikojnë personat që janë larguar jashtë kanaleve zyrtare, duke përdorur të dhëna nga partnerë ndërkombëtarë, përfshirë Agjencinë e OKB-së për Refugjatët (UNHCR).
UNHCR njoftoi se ka vërejtur një rënie të ndjeshme të numrit të banorëve në javët e fundit. Përfaqësuesi i saj në Siri, Gonzalo Vargas Llosa, tha se autoritetet lokale kanë planifikuar zhvendosjen e familjeve të mbetura dhe kanë kërkuar mbështetjen e agjencisë për kampet e reja.
Qeveria siriane synon ta mbyllë përfundimisht al Hol-in. Familjet e mbetura po transferohen në zona në Akhtarin dhe Jarabulus, në veri të provincës së Alepos, pranë kufirit me Turqinë, ku janë përgatitur strehime me kontejnerë dhe ndërtesa betoni. Sipas zyrtarëve, shumica e të zhvendosurve janë gra dhe fëmijë dhe parashikohen programe rehabilitimi dhe integrimi.
Sipas qeverisë, kampi al Hol nuk është më funksional dhe nuk do të rikthehet, për shkak të dëmeve të mëdha dhe kostos së lartë të rikonstruksionit. Konvoji i parë i transferimit u nis këtë javë me 10 autobusë dhe 35 kamionë, në koordinim me autoritetet siriane dhe Gjysmëhënën e Kuqe Arabe Siriane.
Ndërkohë, ish-punonjës kurdë të kampit kanë shprehur shqetësim për sigurinë. Jihan Hanan, e cila drejtoi kampin për katër vite deri në marrjen e tij nga qeveria, tha se mungesa e një sistemi të qartë për gjurmimin e personave që janë larguar është alarmante.
Ajo tregoi se ka parë video ku pjesë të mëdha të kampit duken të zbrazura. Sipas shifrave të saj të 19 janarit, në kamp ndodheshin rreth 23 mijë persona. Një video e shpërndarë në internet tregon një ish-banore që e kërcënon me emër nga brenda zyrës së saj të djegur dhe të shkatërruar, duke premtuar se do ta gjejë dhe duke paralajmëruar edhe ish-punonjës të tjerë.
“Kjo ka krijuar frikë të vërtetë për mua dhe fëmijët e mi,” tha ajo. “Kjo është gjuha e ekstremistëve.”
Sipas saj, shumë ish-banorë fajësonin stafin për ndalimin e tyre dhe mbi 1,000 punonjës civilë e humanitarë që kanë punuar ndër vite në al Hol tani i frikësohen hakmarrjeve.
gijotina.com/
Discussion about this post