Myrto Uzuni e nis mbarë sezonin e ri në SHBA, shënon gol në barazimin 2-2 të Austin FC

Myrto Uzuni shënoi sot një nga golat e Austin FC në barazimin 2-2 kundër Minnesota United.

SHBA – Sulmuesi i kombëtares shqiptare të futbollit, Myrto Uzuni, e ka nisur në mënyrën më të mirë sezonin e ri në MLS, duke gjetur menjëherë rrugën e rrjetës me fanellën e Austin FC.

Pas një merkatoje janari të komplikuar, ku transferimi drejt kampionatit turk me fanellën e Trabzonspor nuk u konkretizua, sulmuesi beratas duket se ka lënë gjithçka pas dhe është fokusuar plotësisht te aventura amerikane. Besimi i stafit teknik u pa që në javën e parë, teksa Uzuni u aktivizua si titullar në përballjen e barazuar 2-2 kundër Minnesota United.

Shqiptari ishte ndër më aktivët në repartin sulmues dhe u shpërblye në minutën e 76-të, kur devijoi saktë topin para portës duke kaluar Austin në avantazhin 2-1. Goli i tij dukej se do t’i jepte fitoren skuadrës, por Minnesota barazoi në çastet e fundit, duke bërë që sfida të mbyllej 2-2.

Pavarësisht zhgënjimit për rezultatin, ky ishte një fillim i mirë për Uzunin, i cili në sezonin e tij të dytë në MLS synon të konfirmojë formën e bomberit që shfaqi në Spanjë me Granadën.

gijotina.com/