Prej vitesh, Dubai konsiderohej si një strehë e sigurt për persona të shpallur në kërkim nga drejtësia shqiptare. Mungesa e një marrëveshjeje të drejtpërdrejtë ekstradimi me Emiratet e Bashkuara Arabe kishte krijuar bindjen se të shumëkërkuarit mund t’i shmangeshin lehtësisht ndjekjes penale duke u vendosur atje.
Por ky perceptim ka nisur të shembet. Nga marsi 2024 deri në shkurt 2026, autoritetet shqiptare kanë realizuar 15 ekstradime nga Dubai, duke shënuar një ndryshim të qartë në mitin e paprekshmërisë.
Ekstradimi i parë që sinjalizoi këtë kthesë ishte ai i Bruno Çobos më 13 mars 2024, i akuzuar për mashtrim kompjuterik, i ndjekur një muaj më pas nga Panol At Nikoll për të njëjtën vepër penale. Më 14 gusht 2024 u realizua një nga operacionet më të bujshme, me kthimin në Shqipëri të Plarent Dervishajt dhe Julian Meçajt, të akuzuar për vrasje.
Gjatë vitit 2025, lista e të ekstraduarve u zgjerua me emra të njohur të botës së krimit, mes tyre Florenc Çapja, Armis Stafa dhe Dashnor Dumani. Më 19 qershor 2025, brenda një dite, u realizuan tre ekstradime të tjera, ndërsa në vijim u dorëzuan edhe Denis Bajri, Kleviol Ahmeti dhe Amar alias Dritan Shkëmbi.
Ekstradimi më i fundit dhe ndër më të bujshmit ishte ai i Durim Bamit, më 26 shkurt 2026.
Aktualisht, pritet që edhe pesë persona të tjerë të kthehen në Shqipëri, ndërsa autoritetet vijojnë koordinimin me homologët në Emiratet e Bashkuara Arabe. Zhvillimet e fundit tregojnë se Dubai nuk konsiderohet më një strehë e garantuar për t’i shpëtuar drejtësisë shqiptare.
Discussion about this post