Pas aksionit për arrestimin e Flodian Plakut, i njohur si Pole Qorri, në Orikum të Vlorës dhe sekuestrimit të telefonit të tij, hetimet kanë vijuar nga ana e SPAK prej disa kohësh. Burime nga policia e Vlorës bëjnë me dije se prej kohësh eksponentë të dyshuar kriminalë janë mbajtur nën vëzhgim duke ndërhyrë ditën e sotme në zonën e Ujit të Ftohtë ku është rrethuar një perimetër i gjerë i sigurisë.
Aksioni është bërë nga forcat RENEA dhe SPAK dhe më pas është lajmëruar policia e Vlorës, ndërsa për mbështetje është edhe Byroja Kombëtare e Hetimit.
RENEA ka bllokuar Unazën e Vlorës, rrugën paralele me lungomaren. Prej orëve të para të mëngjesit, ka qenë në monitorim të zonës me dron. Rreth 40 efektivë janë ende në terren. 10 autoblindë kanë rrethuar një pallat.
Operacioni po kryhet me kërkesë të SPAK për të ekzekutuar 7 urdhërarreste në kuadër të një hetimi për një grup të strukturuar kriminal, pjesë e të cilëve janë dhe Flodian Plaku dhe Ervis Matodoshaj.
Ndërkohë janë lëshuar urdhër arreste për Ines Hajrulla dhe Ervis Hajrullah.
Flodian Plaku akuzohet për vrasjen e ish-policit Gentian Bejtja në mars 2024, në Larushk të Fushë-Krujës.
Krimi dyshohet se ndodhi me motive hakmarrjeje, si pasojë e luftës së për hakmarrje dhe rivalitet mes grupeve kriminale të Fushë-Krujës, Ervis Martinajt, Indrit Dokles dhe Durim Bamit.
Sipas mediave italiane, Flodian Plaku ishte koka e një grupi kriminal së trafikut të drogës nga Vlora drejt Italisë.
Ai kishte lidhje shumë të forta në Toskanë dhe udhëtonte shpesh nga Brindisi për të siguruar ngarkesën. Droga nëpërmjet korrierëve shpërndahej nga Puglia drejt Romës, Napolit, Milanos dhe Firenzes.
Discussion about this post