Kreu i Partisë Demokratike, Sali Berisha, artikuloi qëndrimin e tij për zgjedhjet lokale dhe protestën e paralajmëruar më 17 prill, duke i vendosur të dyja në të njëjtin kornizim politik: largimin e Edi Ramës si kusht paraprak.
Berisha deklaroi se procesi i përzgjedhjes së kandidatëve do të fokusohet te përfaqësimi, por pa dhënë kritere konkrete apo mekanizma për këtë proces.
“Do të bëjmë gjithçka të kemi kandidatët më përfaqësues. Theksoj se rruga e vetme për zgjedhje të lira e të ndeshmë është largimi i Ramës. Çdo iluzion se ai pranon zgjedhje të ndershme është mbështetje e hapur për diktaturën”, tha ai.
Lidhur me protestën që pritet të zhvillohet më 17 prill, Berisha tha se nuk do të jetë e dhunshme.
“Thirrje nga zemra për çdo qytetar shqiptar, pavarësisht bindjes politike. Për çdo të ri dhe pensionist, punonjës, intelektual, më 17 prill t’i tregojmë Europës dhe botës që qendrojmë të palëkundur para hajdutëve pa ligj e moral, që po i mbyllin Shqipërisë dyert e integrimit. Protesta jonë është shpresë për shqiptarët, mesazh se ne qendrojmë kundër korrupsionit. Vjedhjeve, për shtetin ligjor dhe të ardhmen europiane.
Ne nuk synojmë të marrim pushtet me dhunë. Protesta tona nuk kanë përmbysur qeverinë por kanë arritur diskriminimin më të madh të qeverisë, përfaqësuan shqiptarët me dinjitet kur lobistë rracistë anti-shqiptarë thanë se shqiptarët janë të pa ndjeshëm për vjedhjet e bëra. Jam i sigurt që protestuesit do të donin një tjetër skenar. Por jam i bindur që skenarët paqësor do të na bëjnë të arrijmë qëllimin tonë”, tha ai.
Discussion about this post