Zjarri shkrumboi pallatin në Tiranë, arrestohen 4 persona dhe shpallet në kërkim ndërtuesi Armand Lilo

Katër persona janë arrestuar në kuadër të hetimeve që po zhvillohen për zjarrin e rënë në një pallat 12-katësh në Tiranë ditën e djeshme.

Ndër të arrestuarit janë administratori i pallatit dhe menaxherja e supermarketit ‘Big Market’ që ndodhej në katin e parë.

Konkretisht në pranga ka rënë inxhinieri, Enver Admi, kontraktori i fasadës Altin Furtuna, administratori i pallatit Agron Cara, si dhe menaxherja e Big Market që ndodhej në katin e parë të pallatit, Razie Sula.

Mësohet gjithashtu se është shpallur në kërkim ndërtuesi i kompleksit Armand Lilo.

Zjarri në kompleksin e pallateve te zona e njohur si “Farmacia 10” dyshohet se nisi në cepin e një marketi në disa mbeturina kartoni që i kishin lënë punonjësit e marketit.

Si pasojë, rreth 10 persona mbetën të lënduar ndërsa dëmet materiale janë të pallogaritshme.

Hetimet janë ende në zhvillim dhe autoritetet po punojnë për të zbardhur plotësisht shkaqet e zjarrit dhe përgjegjësitë përkatëse të personave të përfshirë.