Vdekja e një 19-vjeçareje shqiptare, e identifikuar si Myrto, ka shkaktuar reagime të forta në Greqia, ndërsa autoritetet vijojnë hetimet për rrethanat e ngjarjes.
Sipas të dhënave zyrtare, e reja u dërgua pa ndjenja në spitalin e Kefalonia, pasi ishte braktisur në një shesh në Argostoli nga tre persona, të cilët tashmë janë arrestuar.
Ministri grek i Shëndetësisë, Adonis Georgiadis, reagoi publikisht për rastin, duke mbrojtur veprimet e stafit mjekësor. Ai publikoi edhe një deklaratë të administratës së spitalit, e cila hodhi poshtë pretendimet për vonesa në trajtimin e pacientes, duke theksuar se ndërhyrja ka qenë e menjëhershme dhe profesionale.
Sipas autoriteteve shëndetësore, mjekët kanë reaguar brenda pak minutash nga momenti i mbërritjes së 19-vjeçares në urgjencë. Megjithatë, Georgiadis deklaroi se e reja kishte mbërritur në gjendje kritike, me shenja jete minimale, duke e bërë të pamundur shpëtimin e saj.
Raporti paraprak mjeko-ligjor tregon se shkaku i vdekjes dyshohet të jetë një atak kardiak, ndërsa hetimet po fokusohen edhe në përdorimin e mundshëm të lëndëve narkotike. Sipas dëshmive të para, viktima kishte konsumuar kokainë, një fakt që pritet të konfirmohet nga analizat toksikologjike.
Ndërkohë, autoritetet kanë mbledhur prova në ambientin ku e reja kishte qëndruar përpara ngjarjes, përfshirë gjurmë gjaku dhe sende të tjera, të cilat pritet të ndihmojnë në zbardhjen e plotë të rastit.
Tre persona të moshës 22, 23 dhe 26 vjeç janë vënë në pranga, pasi dyshohet se kanë qenë në shoqërinë e 19-vjeçares në orët e fundit dhe e kanë braktisur atë në gjendje të rëndë shëndetësore. Hetimet vijojnë për të përcaktuar përgjegjësitë ligjore të secilit prej tyre.
gijotina.com/
Discussion about this post