Gjykata e Posaçme ka ekzekutuar masën “arrest me burg” për Lulzim Pepën, Fation Markun dhe Anton Kolën, të dyshuar si pjesëtarë të një grupi kriminal. Sipas informacioneve paraprake, ky grup, i cili drejtohej nga Lulzim Pepa, akuzohet për trafikimin e rreth 7.5 tonëve kokainë nga Amerika Latine drejt vendeve të Bashkimit Europian.
Hetimet e SPAK kanë dokumentuar të paktën tetë raste të trafikimit në sasi të mëdha gjatë periudhës 2019-2021. Operacioni u shtri në disa shtete dhe u realizua falë bashkëpunimit të ngushtë me agjencitë Eurojust dhe Europol.
Krahas masave të sigurisë për 11 persona, autoritetet kanë shpallur në kërkim edhe shtetasin Jetmir Pepa. Ky i fundit është një emër i njohur për drejtësinë, pasi rezulton i përfshirë në një ngjarje me armë në fillim të vitit 2025.
Gjatë këtij aksioni, janë sekuestruar pasuri të shumta me vlerë totale prej 12 milionë eurosh, të cilat dyshohet se burojnë nga aktiviteti kriminal. Lista e sekuestrove përfshin biznese, hotele, dhjetëra makina luksoze dhe llogari bankare në qytete të ndryshme të Shqipërisë.
Discussion about this post