Kryeministri Edi Rama, ditën e sotme, ka njoftuar firmosjen e marrëveshjes mes shoqërisë italiane Ficantieri dhe kompanisë KAYO, për të prodhuar në Shqipëri në kantierin e Pashalimanit anije lundruese për ushtrinë shqiptare, por edhe të vendeve aleate.
Sipas Ramës kjo marrëveshje është një partneritet strategjik me qeverinë e Italisë.
“Partneritet strategjik me qeverinë e Italisë. Kjo është një marrëveshja me Ficantieri për të krijuar një shoqëri të re për të prodhuar në Shqipëri në kantierin e Pashalimanit anije lundruese, që janë në dobi të ushtrisë shqiptare, por edhe për ushtri të tjera për vendet aleate.
Kjo marrëveshje është një lajm shumë i mirë për të rinjtë, për vajzat dhe djemtë e shkollës Industriale të Vlorës, të cilët do jenë të parët që do ftohen për të marrë pjesë në një rrugëtimi formimi të përshtatur për të qenë nesër, pjesëmarrës të kësaj shoqëria të re ekselence në territorin e tyre, në qytetin e tyre.”, tha Rama.
Ndërsa ministri i Mbrojtjes, Ermal Nufi, u shpreh se falë këtij bashkëpunimi do të përfitojë ushtria por edhe ekonomia shqiptare.
“Është një vlerë e shtuar jo vetëm për Shqipërinë, por edhe për eksportin. Nga ky bashkëpunim ka disa vlera strategjike. Shqipëria bëhet një bazë e re europiane e Ficantieri për anijet e vogla dhe të mesme…. Rreth 400 persona do të punësohen në këtë kantier të ri. Është një kantier i fjalës së fundit të teknologjisë që do të zhvillohet në Vlorë. Jam i bindur që kjo shoqëri e re që do të krijohet do të jetë krenari për ne”, tha Nufi.
Discussion about this post