Deputeti i kërkon llogari: Pse hesht qeveria Rama për aktivistin shqiptar që është marrë peng nga Izraeli?

Deputeti Redi Muçi kërkoi në Kuvend reagim nga qeveria shqiptare për rastin e shtetasit shqiptar Baki Goxhaj, i cili sipas tij po mbahet peng nga autoritetet izraelite së bashku me aktivistë të tjerë që po transportonin ndihma humanitare drejt Gazës.

Në fjalën e tij, Muçi tha se Shqipëria duhet të thërrasë ambasadorin izraelit dhe të mbajë qëndrim publik për çështjen.

“Baki Goxhaj është marrë peng së bashku me dhjetëra aktivistë të tjerë duke çuar ndihma humanitare në Gaza. Ndërkohë që vende të tjera kanë reaguar, përse heshtim ne?”, deklaroi ai.

Deputeti kritikoi qëndrimin e institucioneve shqiptare, duke pyetur pse nuk ka reagim për një shtetas shqiptar që sipas tij mbahet në “kampe torturash”.

“Përse heshtni ju për faktin që një shtetas shqiptar është marrë peng dhe mbahet në kampe torturash nga ministri fashist? Çfarë do të bënit nëse një shtetas shqiptar do merrej peng nga rusët apo iranianët?”, u shpreh Muçi.

Ai komentoi edhe raportin e kryeministrit Edi Rama me kryeministrin izraelit Benjamin Netanyahu, duke e kritikuar vizitën e Ramës në Izrael.

“A jeni krenar që Rama shkoi në shtëpinë e Netanyahut dhe u përul përpara tij, përpara njeriut që akuzohet për krime? A mos pretendoni që po mbroni interesat e shqiptarëve?”, deklaroi deputeti në Kuvend.

Ministria për Evropën dhe Punët e Jashtme ka reaguar lidhur me situatën e shtetasit shqiptar Baki Goxhaj, pjesëmarrës në flotiljen “Sumud”, i cili është ndaluar nga autoritetet izraelite së bashku me aktivistë të tjerë të misionit.Sipas MEPJ-së, Goxhaj është transferuar në Izrael, ndërsa Ambasada e Republikës së Shqipërisë në Tel Aviv është në kontakt të vazhdueshëm me autoritetet izraelite për të ndjekur rastin dhe për të siguruar informacion mbi gjendjen e tij.

Ministria bën të ditur se përfaqësues të ambasadës shqiptare pritet të zhvillojnë së shpejti një takim me Goxhajn, me qëllim ofrimin e asistencës së nevojshme konsullore.

Baki Goxhaj ishte pjesë e flotiljes ndërkombëtare “Sumud”, e cila ishte nisur drejt Gazës në kuadër të një misioni humanitar dhe u ndalua nga autoritetet izraelite gjatë rrugës. Raportimet e mëhershme në mediat shqiptare e lidhën rastin e tij me ndërhyrjen ndaj flotiljes dhe mungesën fillestare të informacionit mbi vendndodhjen e tij.