Tre persona janë arrestuar nga policia greke pas një ndjekjeje si në filma në rrugët e Athinës, ndërsa një tjetër është shpallur në kërkim, pas plagosjes me armë të një biznesmeni me origjinë pakistaneze.
Sipas autoriteteve greke, dy nga të arrestuarit janë shqiptarë, Jerasimo Korkuti, 31 vjeç dhe Adi Beqiri, 27 vjeç, si dhe një shtetas grek. Ndërsa, një person i katërt ka arritur të largohet dhe vijon të jetë ende në kërkim nga policia.
Konkretisht ngjarja ndodhi dje rreth orës 18:30 në rrugën “Patision” në Athinë, ku një person hyri në një dyqan telefonash celularë dhe qëlloi me armë zjarri pronarin e biznesit. Ky i fundit me origjinë pakistaneze, mbeti i plagosur në këmbë dhe u transportua menjëherë në spital për ndihmë mjekësore.
Pas sulmit, autorët u larguan me një automjet BMW ngjyrë gri, ku ndodheshin katër persona. Gjatë arratisjes, ata kryen manovra të rrezikshme dhe u përplasën me disa automjete në rrugët e qytetit.
Më pas autoritetet greke iu vunë menjëherë në ndjekje dhe arritën të ndalojë automjetin në rrugën “Tsounta”, në bulevardin “Kifissou”, në drejtim të Lamias. Gjatë operacionit, makina e autorëve u përplas me disa mjete të tjera. Tre persona u arrestuan në vendngjarje, ndërsa hetimet vijojnë për kapjen e personit të katërt dhe për zbardhjen e plotë të plagosjes.
Discussion about this post