Janë publikuar fotot e dy punonjësve të Policisë së Shtetit që u përfshinë në operacionin e zhvilluar mëngjesin e së enjtes në zonën e Lozhanit, në Maliq, ku një efektiv humbi jetën dhe një tjetër mbeti i plagosur gjatë shkëmbimit të zjarrit me një person të shpallur në kërkim.
Efektivi që mbeti i vrarë është identifikuar si Enea Mekolli, ndërsa polici i plagosur është Edison Adri. Dy efektivët e policisë janë me origjinë nga Pogradeci.
Sipas informacioneve paraprake, strukturat e policisë kishin organizuar një operacion për kapjen e shtetasit Violand Braçellari, i cili rezultonte person në kërkim. Fillimisht, forcat e policisë kanë shkuar pranë banesës së tij, ndërsa më pas operacioni është zhvendosur në një zonë periferike dhe malore të njësisë administrative Lozhan.
Gjatë ndërhyrjes ka pasur shkëmbim zjarri mes policisë dhe personit në kërkim. Si pasojë, efektivi Enea Mekolli humbi jetën, ndërsa kolegu i tij Edison Adri mbeti i plagosur.
Nga të shtënat është plagosur edhe vetë Braçellari, i cili më pas është vënë në pranga dhe ndodhet nën kujdesin e mjekëve në spital.
Autoritetet kanë nisur hetimet për të zbardhur plotësisht rrethanat e ngjarjes së rëndë, e cila tronditi Policinë e Shtetit dhe opinionin publik.
Njoftimi i policise
Korçë/Informacion paraprak
Humbet jetën në krye të detyrës, 1 punonjës policie, si dhe plagoset një tjetër punonjës policie, nga sulmi me armë zjarri nga një person i kërkuar i cili u neutralizua dhe u plagos gjatë shkëmbimit të zjarrit gjatë një operacioni për kapjen e tij.
Në zbatim të planit të masave për kapjen e personave në kërkim, bazuar dhe në informacionet e siguruara për vendndodhjen e një personi të kërkuar, me rrezikshmëri të lartë, shërbimet e Drejtorisë Vendore të Policisë Korçë, Komisariatit të Policisë Maliq dhe të Komisariatit të Policisë Korçë, kanë organizuar punën dhe kanë shkuar në zonën e Lozhanit, në malin Boden, Bashkia Maliq.
Rreth orës 07:30, shërbimet e Policisë kanë rrethuar vendin (stanin) ku dyshohej se fshihej personi në kërkim, konkretisht shtetasi Violand Braçellari, 43 vjeç, i dënuar në vitin 2017 me 9 vjet, 11 muaj e 7 ditë burgim nga Gjykata e Korçës, për veprën penale “Prodhimi dhe shitja e narkotikëve”, ndërsa në vitin 2011 ndaj tij është caktuar masa e sigurisë “Arrest në burg”, për veprën penale “Kultivimi i bimëve narkotike”.
Shërbimet e Policisë i kanë bërë thirrje të kërkuarit të dilte dhe të dorëzohej, por ai nuk i është bindur thirrjes së Policisë dhe ka hapur zjarr në drejtim të punonjësve të Policisë, ku për pasojë ka humbur jetën punonjësi i Policisë, inspektor E. M., 34 vjeç, dhe ka mbetur i plagosur punonjësi i Policisë, inspektor E. A., 36 vjeç (të dy punonjës të Forcës së Posaçme “Shqiponja” të DVP Korçë).
Për të neutralizuar sulmin e të kërkuarit, shërbimet e Policisë i janë kundërpërgjigjur me armë zjarri dhe, si pasojë e shkëmbimit të zjarrit, ka mbetur i plagosur edhe i kërkuari, shtetasi Violand Braçellari, i cili më pas është arrestuar.
Në drejtim të vendit të ngjarjes është nisur helikopteri i shëndetësisë.
Grupi hetimor, nën drejtimin e Prokurorisë dhe në bashkëpunim me Agjencinë e Mbikëqyrjes Policore, po vijon punën për dokumentimin e plotë ligjor të kësaj ngjarjeje shumë të rëndë, ku humbi jetën në krye të detyrës një punonjës Policie dhe mbeti i plagosur një tjetër punonjës i Policisë.
Discussion about this post