Tre marinarë indianë janë konfirmuar të vdekur pas sulmit të ndërmarrë nga forcat amerikane ndaj një tankeri të lidhur me Iranin në Gjirin e Omanit, një incident që po shkakton reagime të forta në Indi.
Lajmi u bë i ditur nga Ministri indian i Porteve, Transportit Detar dhe Rrugëve Ujore, Sarbananda Sonowal, i cili tha se tre anëtarët e ekuipazhit, të raportuar fillimisht si të zhdukur, janë gjetur pa jetë dhe janë identifikuar nga autoritetet.
“Është një humbje e madhe për komunitetin tonë detar”, deklaroi Sonowal, duke shprehur ngushëllimet për familjet e viktimave.
Anija cisternë MT Settebello, me flamur të Palaut, u godit teksa po lundronte në Ngushticën e Omanit. Në bord ndodheshin 24 persona, ndërsa 21 prej tyre arritën të shpëtohen.
Pas ngjarjes, India ka dënuar zyrtarisht sulmin dhe ka thirrur për sqarime përfaqësuesin diplomatik amerikan në Nju Delhi.
Sipas Komandës Qendrore të SHBA-së (CENTCOM), një avion amerikan goditi me municione precize dhomën e motorëve të anijes pasi ekuipazhi nuk iu bind urdhrave të përsëritura të forcave amerikane. Autoritetet amerikane pretendojnë se anija ishte pjesë e rrjetit të transportit të naftës iraniane, objektiv i bllokadës detare të vendosur nga SHBA.
Ministri Sonowal bëri të ditur se autoritetet indiane po punojnë për riatdhesimin e menjëhershëm të anëtarëve të mbijetuar të ekuipazhit, si dhe për kthimin e trupave të viktimave pranë familjeve të tyre.
Ngjarja pritet të shtojë tensionet diplomatike mes Indisë dhe Shteteve të Bashkuara, në një periudhë kur marrëdhëniet mes dy vendeve kanë njohur disa momente të vështira.
Discussion about this post