Vetëm tre ditë pasi u largua nga grupi parlamentar i Partisë Socialiste dhe u vetëshpall deputete e pavarur, Marjana Koçeku i është përgjigjur kritikëve brenda mazhorancës që i kërkojnë të dorëzojë mandatin.
Përmes një postimi në rrjetet sociale, Koçeku ka deklaruar se mandati nuk i përket Partisë Socialiste, por asaj dhe votuesve që e mbështetën.
Me ironi, Koçeku thotë se kësaj radhe do të kandidojë në Tiranë “me kecin tim të shtrenjtë dhe kmesën e mprehtë”.
Reagimi i Marjana Koçekut:
Nuk ua kam marrë mandatin e deputetit. Ma keni marrë ju mue, për 10 muej rresht. Tash mandati ka ardhë në vend të vet. Nëse jeni kaq të sigurt që unë nuk fitoj pa ju dhe ju i keni plot 83 mandate, atëherë shpërndajeni parlamentin, shkojmë në zgjedhje të parakohshme dhe masim forcat se kush fiton çka.
Kësaj radhe do marr me vete kecin tim të shtrenjtë, bashkë me kmesën e mprehtë, dhe do zbres me kandidue në Tiranë. Para se të vij, ndoshta iu marr leje malësorëve të mi me e folë gjuhën standarde.
Po ashtu, gjatë ditës së djeshme, Marjana Koçeku, e njohur ndryshe edhe si “Neomalësorja” ka postuar në rrjete sociale një foto të një flamingoje, duke shprehur kështu mbështetjen ndaj protestave masive për largimin e Ramës, që kanë marrë emrin “Revolucioni Flamingu”.
Discussion about this post