Situata para godinës së Kuvendit u tensionua ndjeshëm këtë të mërkurë, përpara nisjes së seancës plenare, ku protestuesit u përplasën me forcat e policisë në përpjekje për të çarë perimetrin e sigurisë.
Disa protestuese gra kanë formuar një “gardh” njerëzor përpara forcave të policisë për të penguar dhunën e tyre ndaj qytetarëve, të cilët përsërisin thirrjet kundër deputetëve të cilët hynë në Kuvend për seancën plenare.
Protestuesit, të mbledhur prej orëve të para të mëngjesit, ndërmorën një aksion duke tërhequr dhe shkulur gardhin metalik të vendosur nga policia në hyrje të Pedonales, pranë godinës së Parlamentit. Përballë tentativës për të depërtuar në zonën e sigurisë, efektivët ndërhynë për të zmbrapsur turmën.
Gjatë përplasjes, policia përdori sprej irritues për të shpërndarë protestuesit dhe për të rimarrë kontrollin e situatës. Si pasojë e ndërhyrjes, raportohet se disa protestues mbetën të lënduar.
Në momentet e tensionit, disa qytetarë tentuan të pengonin hyrjen e deputetëve në ambientet e Kuvendit. Po ashtu, pesë protestues arritën të kalonin kordonin e sigurisë, duke detyruar policinë të ndërhynte menjëherë. Si rezultat, disa persona u shoqëruan, mes tyre edhe Gent Progni.
Protesta u shoqërua edhe me incidente gjatë mbërritjes së deputetëve në Kuvend. Një pjesë e ligjvënësve të Partisë Socialiste kishin hyrë më herët në sallën e seancave, ndërsa mbërritja e deputetëve të tjerë u prit me hedhje vezësh nga protestuesit.
Objekt i sulmit u bë edhe automjeti i kryetarit të Kuvendit, ndaj të cilit u hodhën vezë dhe miell. Gjithashtu, protestuesit hodhën vezë në drejtim të deputetëve socialistë, mes tyre Ardit Bido, Ervin Demo dhe Blendi Klosi, ndërsa ata hynin në godinën e Parlamentit.
Ndryshe u pritën deputetët e opozitës. Teksa kalonin pranë protestuesve, nga turma u dëgjuan thirrje si “opozitë e shitur”, pa u raportuar incidente të tjera ndaj tyre.
Në zonën përreth Kuvendit vijojnë të jenë të pranishme forca të shumta policie, ndërsa situata mbetet e tensionuar, megjithëse në momente të caktuara është raportuar një qetësim i përkohshëm i gjendjes. Seanca plenare pritet të zhvillohet nën masa të shtuara sigurie.
Discussion about this post