Pasi Gjermania u eliminua nga Kupa e Botës 2026, portieri legjendar Manuel Neuer ka konfirmuar se nuk do të jetë më pjesë e kombëtares, duke mbyllur një karrierë të jashtëzakonshme me fanellën e “Panzerëve”.
40-vjeçari e cilësoi eliminimin si një nga zhgënjimet më të mëdha të karrierës së tij, duke pranuar se skuadra ishte shumë larg pritshmërive.
Në një mesazh emocionues të publikuar në rrjetet sociale, Neuer theksoi se rikthimi i tij për këtë Botëror ishte një vendim i menduar mirë, me synimin për të ndihmuar brezin e ri të futbollistëve dhe për të dhënë kontributin e tij si në fushë, ashtu edhe jashtë saj.
“Veshja e fanellës së Gjermanisë ka qenë gjithmonë një krenari e madhe për mua. Doja të isha pranë lojtarëve të rinj dhe të ndihmoja ekipin me përvojën time”, u shpreh ai.
Megjithëse aventura përfundoi më herët sesa pritej, Neuer theksoi se nuk pendohet për rikthimin në kombëtare.
Ai falënderoi tifozët për mbështetjen e vazhdueshme gjatë gjithë karrierës së tij, duke theksuar se mirënjohja ndaj tyre do të mbetet gjithmonë e veçantë.
Me këtë vendim, mbyllet një epokë e artë për futbollin gjerman, ku Manuel Neuer do të kujtohet si një nga portierët më të mëdhenj në historinë e sportit.
Discussion about this post