Protesta e zhvilluar këtë të enjte para Kuvendit të Shqipërisë është shoqëruar me tensione dhe përplasje mes protestuesve dhe forcave të policisë, ndërsa mbi 20 persona janë shoqëruar nga efektivët.
Qytetarët u mblodhën pranë hyrjes së Parlamentit në kohën kur deputetët po hynin për seancën plenare, duke kërkuar dorëheqjen e qeverisë dhe mbajtjen e zgjedhjeve të parakohshme.
Gjatë protestës, pjesëmarrësit hodhën vezë dhe sende të tjera në drejtim të automjeteve të disa deputetëve dhe ministrave.
Në protestë nuk munguan as thirrjet kundër mazhorancës, por edhe kritikat ndaj opozitës, të cilën një pjesë e protestuesve e akuzuan për mungesë reagimi dhe veprimi.
Situata u tensionua kur disa protestues tentuan të çanin kordonin e sigurisë të vendosur nga policia.
Në përgjigje, efektivët ndërhynë duke përdorur ujë me presion për të shpërndarë turmën dhe për të rikthyer kontrollin pranë godinës së Kuvendit.
Gjatë përplasjeve u raportuan edhe persona të lënduar nga të dyja palët.
Sipas informacioneve të deritanishme, në total janë ndaluar 20 protestues.
Katër prej tyre do të kalojnë natën në qeli dhe pritet të dalin nesër para Gjykatës së Tiranës për caktimin e masës së sigurisë.
Discussion about this post