Shqiptarët e diasporës pritet të mbërrijnë gjatë kësaj të shtune në Tiranë për t’iu bashkuar protestës së paralajmëruar. Sipas një prej koordinatorëve të organizimit, pjesëmarrësit po udhëtojnë nga disa vende europiane, duke hyrë në Shqipëri përmes pikave kufitare të Igumenicës dhe Muriqanit.
Fluksi i lartë i automjeteve ka sjellë radhë të gjata në hyrje të vendit, ndërsa në Muriqan kolona e mjeteve raportohet se shtrihet deri në Urën e Bunës. Koordinatori i protestës bëri të ditur se një pjesë e shqiptarëve që jetojnë në Zvicër, Itali dhe Greqi kanë zgjedhur itinerarin përmes Igumenicës, ndërsa qytetarë nga Belgjika, Franca, Austria, Britania dhe Gjermania po hyjnë nga veriu i vendit.
Sipas tij, shumë prej tyre kanë udhëtuar për dy ditë rresht për të marrë pjesë në protestë. Ai u shpreh se mobilizimi i diasporës synon të bashkojë zërin e shqiptarëve dhe theksoi se protesta do të ketë karakter politik. Në deklaratën e tij, ai i bëri thirrje kryeministrit Edi Rama të japë dorëheqjen dhe të hapë rrugën për krijimin e një qeverie tranzitore apolitike.
Discussion about this post