Protestat që po zgjasin prej 36 ditësh në kryeqytet kanë vijuar sërish këtë të shtunë me pjesëmarrje të madhe qytetare në shesh, ku aktivistët kanë theksuar se lëvizja po merr gjithnjë e më shumë mbështetje edhe nga diaspora shqiptare.
Gjatë fjalës së saj para protestuesve, një aktiviste u shpreh se tubimet e fundit kanë marrë jehonë të gjerë mediatike dhe politike, përfshirë edhe reagime nga jashtë vendit.
Sipas saj, protestat e ditëve të fundit kanë pasur ndikim të dukshëm në opinionin ndërkombëtar.
“Jemi në ditën e tretë të diasporës. Protesta e djeshme ka pasur jehonë në mediat ndërkombëtare dhe ka sjellë reagime edhe në BE dhe Amerikë, si pasojë e vullnetit tonë,” deklaroi ajo.
Aktivistja theksoi gjithashtu se pjesëmarrja e diasporës po e forcon më tej lëvizjen protestuese dhe po zgjeron bazën e saj mbështetëse.
“Shqiptarët dhe diaspora bashkë do ta heqin këtë kryeministër dhe gjithë establishmentin,” u shpreh ajo mes duartrokitjeve të protestuesve.
Protestat në Tiranë vijojnë prej më shumë se një muaji, ndërsa organizatorët kanë paralajmëruar se tubimet do të vazhdojnë deri në përmbushjen e kërkesave të tyre.
Discussion about this post