Gazeta italiane: Shqiptarët “vranë frikën”, Rama nuk shihet më si i paprekshëm

Gazeta italiane “Il Fatto Quotidiano” i ka kushtuar një artikull protestave të fundit në Shqipëri, duke analizuar ndikimin e tyre në raportin mes qytetarëve dhe pushtetit.

Sipas shkrimit, elementi më i rëndësishëm i kësaj lëvizjeje është fakti që “shqiptarët kanë vrarë frikën” dhe se kryeministri Edi Rama nuk perceptohet më si një figurë e paprekshme.

Në artikull, gazetarja investigative Xhesika Tollia, e cila ka ndjekur nga afër protestat për portalin “Shteg”, shprehet se ndryshimi kryesor nuk lidhet vetëm me kërkesat politike, por me marrëdhënien e re që qytetarët kanë krijuar me pushtetin.

“Arritja më e rëndësishme e protestës është ajo që organizatorët e quajnë vrasja e frikës. Shqiptarët nuk e perceptojnë më pushtetin e kryeministrit Edi Rama si të paprekshëm”, citohet në artikull.

Shkrimi sjell edhe dëshmi nga pjesëmarrës të protestave, mes tyre Endrin Hysa, një shqiptar i rritur në Itali, i cili u rikthye në Shqipëri për t’iu bashkuar lëvizjes. Ai thotë se për dekada shqiptarët kanë jetuar me një lloj heshtjeje të imponuar nga frika dhe se tashmë kjo barrierë është thyer.

Sipas gazetës italiane, një rol të rëndësishëm në përhapjen e protestave kanë luajtur rrjetet sociale, të cilat kanë mundësuar shpërndarjen e shpejtë të mesazheve dhe organizimin e qytetarëve jashtë strukturave tradicionale.

Gazetarja argumenton se qeveria fillimisht tentoi të minimizonte protestat dhe më pas kërkoi t’i delegjitimonte ato, duke folur për ndikime të huaja apo duke identifikuar persona të veçantë nga radhët e protestuesve.

Artikulli ndalet edhe te përplasjet e fundit dhe akuzat për përdorim force ndaj disa protestuesve, duke theksuar se tensionet nuk kanë ulur mobilizimin e qytetarëve.

“Manifestimi kombëtar i 4 korrikut, që nxori në rrugë mijëra njerëz, tregoi se protesta vazhdon të mobilizojë qytetarët njësoj si ditën e parë. Pamjet e prindërve që sjellin fëmijët në protesta dhe i lënë të vizatojnë ulur mbi asfalt janë prova më e qartë se shumica e pjesëmarrësve nuk kërkon dhunë. Ata vazhdojnë ta mbështesin lëvizjen me të njëjtin entuziazëm si në fillim”.

Sipas “Il Fatto Quotidiano”, pavarësisht zhvillimeve të ardhshme politike, protesta ka krijuar një kosto të konsiderueshme për qeverinë e Edi Ramës dhe ka ndryshuar mënyrën se si një pjesë e shoqërisë shqiptare e sheh raportin me pushtetin.