Gjykata e Posaçme kundër Korrupsionit dhe Krimit të Organizuar (GJKKO) ka shpallur vendimin për një fraksion të dosjes “Revanshi”, duke dënuar me mbi 31 vite burg pesë anëtarë të grupit kriminal, mes të cilëve edhe dy të afërm të ish deputetit të PS, Eduard Ndreca.
Të pandehurit përfituan nga dënimi me gjykim të shkurtuar, çka solli uljen e masës së dënimit me një të tretën për secilin prej tyre.
Adrian Pikli, ish efektiv i forcave speciale RENEA dhe Devis Bajramaj u dënuan fillimisht me nga 10 vite burgim, dënim i cili u reduktua në 6.8 vite burg për secalin për shkak të gjykimit të shkurtuar.
Armando Ndreca, vëllai i ish deputetit të PS-së Eduard Ndreca, u dënua me 11 vite burg, i cili cili përfundimisht u reduktua në 7.4 vite burg. Ndërsa kushëriri i tij, Elvis Ndreca si dhe Edison Muçeku u dënuan me nga 8 vite burg, dënim që u ul në 5.4 vite burg për secilin.
Anëtarët e këtij grupi kriminal u shpallën fajtorë për një sërë veprash të rënda penale, duke nisur që nga sigurimi i kushteve dhe mjeteve për të kryer vrasje, kultivimi i bimëve narkotike, si dhe armëmbajtja pa leje.
Operacioni “Revanshi”
Në maj 2024 janë goditur 7 grupe të strukturuara kriminale dhe u firmosën 50 urdhër arreste për bosë të krimit dhe anëtarë të grupeve të tyre kriminale. SPAK thekson se janë sekuestruar pasuri me vlerë 4.5 milionë euro, ku përfshihen bizhuteri dhe ora të shtrenjta, flori, euro cash, armë zjarri, automjete luksoze të blinduara, sisteme vrojtimi kamerash, tavolinë pokeri, etj.
Sipas SPAK, në qendër të grupeve kriminale ishte ai i të shumëkërkuarit Ervis Martinajt, i cili ishte në aleancë me grupin kriminal që vepronte në qytetin e Lezhës të drejtuar nga ish-deputet Arben Ndoka. Bëhet me dije se në zonën e Fushë-Krujës vepronte grupi i Durim Bamit i cili ishte në konflikt të hapur me grupin e Martinajt dhe Ndokës. Grupi i Bamit bëri aleancë me një grup kundërshtar të Martinajt që drejtohet nga Leonard Duka dhe Fatmir Hyseni, persona me precedentë të theksuar kriminal me qëllim vrasjen e Martinajt dhe Ndokës dhe anëtarëve të tjerë të këtyre grupeve kriminale.
Në ndihmë të grupeve kriminale të drejtuara Ervis Martinaj dhe Arben Ndoka, vijnë edhe shtetasit Emiljano Shullazi dhe A.Avdylaj, që edhe pse në kushtet e paraburgimit ndihmojnë në realizimin e vrasjes së Durim Bamit. Hetimet kanë evidentuar ekzistencën edhe të një grupi tjetër kriminal të drejtuar nga Edison Reçi. Ky shtetas me qëllim hakmarrje ka organizuar vrasjen e Preng Gjinit. Nga njoftimi i SPAK është evidentuar dhe përfshirja në ngjarjet kriminale edhe një ish-deputeti, Arben Ndoka, katër punonjës policie; drejtori i Drejtorisë Vendore të Policisë Lezhë, Henerigert Mitri, efektivët e RENEA-S, Altin Morina dhe efektivi me iniciale A.P,.
Sipas SPAK, Mitri së bashku me ish-punonjësin e policisë kufitare Klodjan Shahini dhe persona të tjerë drejtonin aktivitetin kriminal të kultivimit të narkotikëve në qarkun e Lezhës. Gjithashtu së bashku me Preng Gjinin, aktualisht në arrest për një hetim tjetër, organizonin aktivitetin e paligjshëm të lojërave të fatit në Lezhë. Gjatë ekzekutimit të vendimeve të GJKKO janë gjetur dhe sekuestruar në cilësinë e provës materiale rreth 3 milionë euro cash vetëm në banesën e Ervis Doçit i njohur ndryshe me pseudonimin Visi i Pojës.
Discussion about this post