Një kapiten shqiptar është arrestuar nga autoritetet portuale greke në Korfuz, pasi dyshohet se drejtonte një traget me numër pasagjerësh mbi kapacitetin e lejuar.
Sipas autoriteteve, bëhet fjalë për një 45-vjeçar, kapiten i një anijeje traget pasagjerësh me flamurin e shtetit “Kitts and Nevis”, e cila po kryente linjën nga një port në Shqipëri drejt Korfuzit.
Gjatë kontrollit të kryer pas mbërritjes së tragetit në port, oficerët e Autoritetit Qendror Portual konstatuan se në bord ndodheshin më shumë pasagjerë sesa lejonte certifikata e lundrimit të anijes.
Pas verifikimeve, kapiteni u arrestua për shkelje të Kodit të së Drejtës Publike Detare, si dhe të legjislacionit që rregullon transportin e pasagjerëve, rastet e mbingarkesës dhe procedurat e kontrollit e regjistrimit të tyre.
Autoriteti Qendror Portual i Korfuzit ka nisur hetimin paraprak për zbardhjen e plotë të rastit, ndërsa paralelisht ka filluar edhe procedura për vendosjen e sanksioneve administrative ndaj përgjegjësve.
Ngjarja ka ngritur shqetësime për respektimin e standardeve të sigurisë në transportin detar të pasagjerëve mes Shqipërisë dhe Greqisë.
Discussion about this post